Ուկրաինայի պաշտպանության ուժերը լիովին վերահսկում են Բելառուսի հետ սահմանը. Հարևան երկրի կողմից սադրիչ գործողություններ չեն գրանցվել, սակայն Մինսկի վրա Մոսկվայի ազդեցության պատճառով սպառնալիքը դեռևս հրատապ է, հեռուստամարաթոնի ժամանակ հայտարարել է Ուկրաինայի պետական սահմանային ծառայության ներկայացուցիչ Անդրեյ Դեմչենկոն։
Ըստ РБК-Украина-ի՝ Դեմչենկոն նշել է, որ Բելառուսի հետ սահմանին իրավիճակը կայուն է, և Ուկրաինայի պաշտպանության ուժերը լիովին վերահսկում են սահմանային գիծը։ Վերջին շրջանում սադրանքներ կամ արտասովոր իրավիճակներ չեն գրանցվել։
«Պետք է հասկանալ, որ հնարավոր սպառնալիքներին արագ արձագանքելու համար մեր հետախույզները մշտապես վերահսկում են Բելառուսի տարածքում կատարվածին։ Ընդհանուր առմամբ, այս ուղղությունը դեռևս սպառնալից է, քանի որ Բելառուսը շարունակում է Ռուսաստանի ազդեցության տակ մնալ, և Ուկրաինայի դեմ պատերազմին ավելի լայնամասշտաբ մասնակցության համար ՌԴ-ն կարող է ճնշում գործադրել Մինսկի վրա»,- ասել է Դեմչենկոն։
Նա նաև նշել է, որ հնարավոր հարձակումներին նախապատրաստվելու համար սահմանին պաշտպանական աշխատանքները շարունակվում են՝ ներառյալ ինժեներական և ամրակայման միջոցառումները:
«Բելառուսական տեխնիկայի կամ զորքերի տեղաշարժ սահմանային գծում չենք տեսնում, սակայն չենք բացառում, որ Բելառուսը Կրեմլի պահանջով կարող է իր ուժերը ավելի մոտ պահել սահմանին։ Իրավիճակը մշտապես վերահսկվում է՝ հնարավոր մարտահրավերներին ժամանակին արձագանքելու համար»,- եզրափակել է Դեմչենկոն։
