Միջազգային հանրությունը պետք է մարդասիրական օգնություն ցուցաբերի Լեռնային Ղարաբաղին։ РИА Новости գործակալության փոխանցմամբ՝ այս մասին հայտարարել է ՌԴ նախագահ Վլադիմիր Պուտինը Դավոսի Համաշխարհային տնտեսական համաժողովի ժամանակ, որն այս տարի անցկացվում է առցանց ձևաչափով։
«Միջազգային հանրության և, անշուշտ, հակամարտության լուծմանը մասնակցող երկրների առջև խնդիր է դրված օգնություն ցուցաբերել տուժած շրջաններին հումանիտար խնդիրների լուծման հարցում՝ կապված փախստականների վերադարձի, ավերված ենթակառուցվածքների վերականգման, պատմական, կրոնական և մշակութային հուշարձանների պահպանման և վերականգնման հետ»,- ասել է ՌԴ նախագահը։
Պուտինը նաև նշել է, որ Ռուսաստանն ակտիվ միջնորդական ջանքեր է գործադրել Լեռնային Ղարաբաղի շրջանում զինված հակամարտությունը դադարեցնելու համար։
«Մենք ձգտում էինք հետևել ԵԱՀԿ Մինսկի խմբի, մասնավորապես, դրա համանախագահների՝ Ռուսաստանի, ԱՄՆ-ի և Ֆրանսիայի միջև ձեռք բերված պայմանավորվածություններին»,- ասել է ՌԴ ղեկավարը՝ հավելելով, որ դա համագործակցության լավ օրինակ է։
