Կառավարության այսօրվա՝ դեկտեմբերի 25–ի նիստում հաստատվեց համընդհանուր պարտադիր ապահովագրության փաթեթում ներառված բժշկական ծառայությունների ցանկը։
ՀՀ առողջապահության նախարար Անահիտ Ավանեսյանը նշեց, որ նաև այսօրվա որոշմամբ սահմանվում են բժշկական ծառայության փոխհատուցման կարգերը։
Ընդունվեց նաև ապահովագրության հիմնադրամի ստեղծման մասին որոշումը։ Նախարարը նշեց, որ երկու ամսվա ընթացքում հիմնադրամը կկարողանա լիարժեք գործել։
Որոշմամբ սահմանվեց նաև դեղորայքի ցանկը, որն արդեն իսկ հրապարակված են «Արմեդ» համակարգում։
ՀՀ վարչապետ Նիկոլ Փաշինյանը նշեց, որ ապահովագրությունը ուժի մեջ է մտնում հունվարի 1–ից մինչև 18 տարեկան բոլոր անձանց համար, 65 տարեկանից բարձր բոլոր անձանց համար և 200 հազար դրամից բարձր աշխատավարձ ստացող բոլոր անձանց համար, նաև 18–65 տարեկան 1–ին, 2–րդ, 3–րդ հաշմանդամության կարգ ունեցող, նաև սոցիալական անապահովության համակարգում ընդգրկված 28 բալից ավելի ունեցող անձանց, նաև զոհված զինծառայողի ընտանիքի անդամների համար։
«Սա 2024 թվականի հուլիսի մեկից էր նախատեսվում, մենք քննարկեցինք, քննարկեցինք, հասկացանք, որ պատրաստ չենք, հետո ասեցինք՝ լավ եկեք կանենք 2025 թվականի հունվարի մեկից։ Հետո քննարկեցինք, քննարկեցինք, հասկացանք, որ պատրաստ չենք։ հետո հասկացանք, որ երբեք էլ պատրաստ չենք լինելու, որովհետև մենք ուզում ենք իդեալական պատրաստ լինել, ունենալ Mercedes 600S-ի մակարդակի մի բան։ Բայց 600 մակարդակի բան կառուցելու համար պիտի մի հատ «Զապառոժից» գոնե կառուցած լինելու փորձ ունենանք»։
Երկրորդը, ես գալիս եմ այն համոզմաբ, որ երբեմն իդեալի ձգտումը բերում է մեզ անգործության։ Մենք պետք է իդեալի այդ մղումից հրաժարվենք, որովհետև դա մեզ անընդհատ տանում է փակուղիներ»,–ասաց Փաշինյանը։
Վարչապետը կոչով դիմեց 1 մլն 600 հազար այն քաղաքացիներին, որոնք 2026 թ. հունվարի 1–ից դառնալու են առողջության համընդհանուր պարտադիր ապահովագրության շահառու. «Սիրելի 1 մլն 600 հազար հայրենակիցներ, խնդրում ենք 2026 թ. հունվարի 1–ից առողջապահական հիմնարկները չգրոհել։
Ես երաշխավորում եմ, որ հիմա MRT, KT, չգիտեմ ինչ, կգտնենք անպայման մի բան, որը պետք է բուժել: Բացառված է, որ չգտնենք որևէ բան, որը բուժելու անհրաժեշտություն չկա: Մեր առողջության ապահովագրության համակարգը դրա մասին է, որ պետք է ստուգումներ լինեն ամեն տարի և դա ճիշտ ճանապարհ է, որ կանխենք հիվանդությունը։ Բայց պետք չի հունվարի 1–ից գրոհ ձեռնարկել առողջապահական համակարգի վրա, որովհետև ոչ բժշկական կենտրոններն են փախնելու, ոչ կառավարությունն է փախնելու»։
