ՀՀ ԱԺ ֆինանսավարկային եւ բյուջետային հարցերի մշտական հանձնաժողովում հոկտեմբերի 8-ին տեղի է ունեցել աշխատանքային քննարկում` ԱԺ պատգամավորների եւ ՀՀ գիտակրթական, գործարար ու հասարակական կազմակերպությունների ներկայացուցիչների հետ: Այս մասին տեղեկանում ենք ԱԺ պաշտոնական կայքից:
Դեռեւս 2019 թվականի սեպտեմբերին ԱԺ ֆինանսավարկային եւ բյուջետային հարցերի մշտական հանձնաժողովում ստորագրվել է համագործակցության բազմակողմ հուշագիր` բուհական հաստատությունների, հետազոտական կենտրոնների, հասարակական ու մասնավոր հատվածը ներկայացնող կազմակերպությունների հետ:
Մշտական հանձնաժողովի նախագահ Գեւորգ Պապոյանը նշել է, որ ստեղծված հարթակը միտված է մեր երկրի ֆինանսատնտեսագիտական հանրույթի միտքն ու փորձագիտական ներուժը ծառայեցնելու խորհրդարանի վերահսկողական գործառույթների ամբողջական իրականացմանը: Նշվել է նաեւ, որ այն լավագույն միջոցն է ոլորտում ունենալու այնպիսի գիտական ներուժ, ինչը թույլ կտա համարժեք արձագանքելու մեր երկրի առջեւ ծառացած տնտեսական խնդիրների լուծմանը:
Հանձնաժողովի նախագահը պատրաստակամություն է հայտնել շարունակելու հուշագիրը ստորագրած կառույցների հետ համագործակցությունը:
«Տնտեսական իրավունքի կենտրոն» ՀԿ-ի նախագահ Մովսես Արիստակեսյանը հակիրճ ներկայացրել է հուշագրի ստեղծման եւ գործունեության մասին տեղեկատվություն, անդրադարձել որոշակի խնդիրների: Նա ընդգծել է մշտական հանձնաժողովի հետ գործակցության կարեւորությունը:
Բազմակողմ հանդիպմանը քննարկվել են հուշագրից բխող աշխատանքային մոտեցումները: Անդրադարձ է կատարվել տնտեսական ոլորտին վերաբերող օրակարգային մի շարք հարցերի:
Նշվել է, որ նմանօրինակ աշխատանքային հանդիպումները լինելու են շարունակական:
