Ղազախստանի նախկին նախագահ Նուրսուլթան Նազարբաևի եղբորորդին՝ Կայրաթ Սաթիբալդուլին, պետությանը կվերադարձնի ավելի քան 50 միլիարդ տենգեի (ավելի քան 104 միլիոն դոլար) ակտիվներ։ Ըստ Tengrinews.kz-ի՝ դրա մասին հայտնել է Գլխավոր դատախազության ակտիվների վերականգնման կոմիտեն։
Կոմիտեում աշխատում են դատական համաձայնագրի պայմանների կատարման ուղղությամբ, ըստ որի Սաթիբալդուլին կխոստովանի մեղքը և ապօրինի ձեռք բերված ակտիվները կվերադարձնի պետությանը: Նշվում է, որ 50 միլիարդ տենգեից այսօրվա դրությամբ 18 միլիարդ տենգեի ակտիվներն արդեն վերադարձվել են։ Դրանց թվին են պատկանում երկու խոշոր բիզնես կենտրոններ Ալմաթիում, կոմերցիոն անշարժ գույք և էլիտար տուն մեր երկրի մայրաքաղաքի հեղինակավոր տարածքում:
Միաժամանակ Սաթիբալդուլիից խուզարկությունների ժամանակ առգրավված 95 հազար դոլարը փոխանցվել է պետական հատուկ հիմնադրամին։
Բացի դրանից, պետությանը վերադարձվել են հարյուր միլիոնավոր տենգե արժողությամբ զարդեր, բրենդային ժամացույցներ, բացառիկ զարդեր, կոլեկցիոն մետաղադրամներ և 174 հատ պերճանքի այլ առարկաներ: ԱՄԷ-ից վերադարձվել են շքեղ Rolls-Royce Cullinan և Aston Martin ավտոմեքենաների տեսքով ակտիվներ, որոնց ընդհանուր արժեքը կազմում է 192 միլիոն տենգե։
Նշվում է նաև, որ Ֆրանսիայում, ԱՄԷ-ում, Թուրքիայում և Ռուսաստանում, 33 միլիարդ տենգե ընդհանուր գումարով Սաթիբալդյուլիին և նրա մերձավորներին պատկանող օտարերկրյա անշարժ գույքի փոխանցումն ավարտման փուլում է։
