Արմեն Սարգսյանը ՍԴ անդամի թափուր տեղի համար խորհրդարան է ներկայացրել ԵՊՀ իրավագիտության ֆակուլտետի պետության և իրավունքի տեսության ու պատմության ամբիոնի վարիչ, իրավաբանական գիտությունների դոկտոր, պրոֆեսոր Արթուր Վաղարշյանի թեկնածությունը: ՍԴ դատավորի ընտրության հարցը Ազգային ժողովը կքննարկի մայիսի 29-ին:
Սակայն, մամուլի հրապարակման համաձայն` ԱԺ իշխող մեծամասնությունն ուներ ֆավորիտ թեկնածու՝ «Մարտի 1-ի» գործով տուժողների ներկայացուցիչ Վահե Գրիգորյանը, ու ոչ մեկ անգամ է ուղղակի և անուղղակի հասկացրել, որ ուրիշ ում թեկնածությունն էլ ներկայացնի նախագահը, իրենք, միևնույն է, մերժելու են.
«Վահե Գրիգորյանն այս անգամ եղել է նախագահի կողմից ՍԴ դատավորի թափուր պաշտոնի համար նախագահի ներկայացվելիք ինը հավակնորդների թվում, սակայն Արմեն Սարգսյանը նախապատվությունը այլ մարդու է տվել՝ այդպես հակադրվելով խորհրդարանական մեծամասնությանը»- ասված է հրապարակման մեջ:
Հարցին, թե ինչ ակնկալիքներ կան ՍԴ դատավորի ընտրության հարցի կայանալիք քննարկումից, նախագահականի հասարակայնության հետ կապերի բաժնից հայտնեցին, որ այդ մասով հստակ ոչինչ չեն կարող ասել, նախագահը օրենքի պահանջի համաձայան համապատասխան ժամկետում թեկնածու է առաջադրել, մնացածը պետք է Ազգային ժողովը որոշի:
Մեզ հետ զրույցում էլ «Իմ քայլը» խմբակցության պատգամավոր Էդգար Առաքելյանն էլ նշեց, որ ընտրության հարցը անհատական որոշմամաբ չէ, պատգամավորները կքննարկեն և համապատասխան որոշում կկայացնեն:
