Եվրոպական պահեստարաններում գազի պաշարները կարող են չբավարարել ձմռանը չնախատեսված հանգամանքների, դրանց թվում՝ կտրուկ ցրտի կամ Ռուսաստանից վառելիքի մատակարարումների դադարեցման դեպքում: Դրա մասին հայտնել է Bloomberg գործակալությունը։
Նշվում է, որ Եվրոպայում գազապահեստարաններն արդեն գրեթե 90%-ով լցված են՝ նախատեսված ժամկետից ավելի քան երկու ամիս առաջ։ Եվ այս պահուստները պետք է բավարար լինեն, բայց միայն այն դեպքում, եթե «ինչ-որ անկանխատեսելի բան տեղի ունենա»,-պարզաբանում է Bloomberg-ը: Գործակալությունը նշում է, որ պաշարների զգալի մասը մնացել է անցած ձմռանից՝ պայմանավորված այն հանգամանքով, որ օրերը սպասվածից շուտ են տաքացել։ Այս սեզոնին իրավիճակը կարող է ճիշտ հակառակը լինել, և անսպասելի ցրտի դեպքում Եվրոպայում գազը չի բավականացնի։
Բացի դրանից, նշում է Bloomberg-ը, այս տարի Եվրոպան չունի հեղուկացված բնական գազի նույն տպավորիչ պաշարները, որոնք 2023 թվականին լցրել են եվրոպական երկրների ափերի մոտ լցանավերը և ծառայել որպես էներգիայի լրացուցիչ աղբյուր։ Հեղուկացված գազի ներմուծումը Եվրոպա այս ամառ նվազել է 15-20%-ով՝ նախորդ երկու տարիների համեմատ, քանի որ ասիական երկրները համաձայնել են գնել այն մատակարարների համար ավելի բարենպաստ գներով:
Մեկ այլ գործոն, որը կարող է հանգեցնել գազի դեֆիցիտի Եվրոպայում, վառելիքի մատակարարումն է Ռուսաստանի Դաշնությունից, պնդում է գործակալությունը։ 2024 թվականի դեկտեմբերին ավարտվում է պայմանագրի ժամկետը, որով Ռուսաստանն Ուկրաինայի տարածքով գազ է արտահանում ԵՄ որոշ երկրներ, ներառյալ՝ Հունգարիա։ Եթե այն չերկարացվի, այս երկրներում էներգամատակարարման իրավիճակը կվատթարանա։
Bloomberg-ի տվյալներով՝ Եվրոպայում գազի գները զգալիորեն ցածր են, քան 2022 թվականին, բայց դեռ գրեթե կրկնապատկվում են, քան ուկրաինական հակամարտությունից առաջ։ Սա վկայում է նրա մասին, որ եվրոպական երկրներին դեռ չի հաջողվել էներգետիկ ճգնաժամից գլուխ հանել։
Եթե հանգամանքները բարենպաստ զարգանան, և Եվրոպան դեռ բավարար գազ ունենա, մինչև դեկտեմբերի վերջ գները կարող են նվազել։ Եթե այժմ Նիդեռլանդների TTF հանգույցում գազի գինը կազմում է մոտ 40 եվրո մեկ մեգավատ/ժամի դիմաց, տարեվերջին այն կարող է իջնել մինչև 25 եվրո մեկ մեգավատ/ժամի դիմաց։ Բայց առայժմ դրա երաշխիքները չկան։
Ուկրաինական տարածքով ռուսական գազի տարանցման պայմանագրի ժամկետը լրանում է 2024 թվականի վերջին։ Հուլիսին Ուկրաինայի էներգետիկայի նախարար Գերման Գալուշչենկոն հայտարարել էր, որ այն դժվար թե երկարաձգվի։ Այս որոշումը մտահոգություն է առաջացրել մի շարք երկրներում, մասնավորապես՝ Հունգարիայում, որի համար գազի հիմնական մատակարարը դեռևս Ռուսաստանն է։
