Պանամա կատարած այցի ժամանակ Պենտագոնի ղեկավար Փիթ Հեգսեթն ապրիլի 8-ին հայտարարել է, որ ԱՄՆ-ն մտադիր է հասնել Պանամայի ջրանցքի նկատմամբ Չինաստանի ազդեցության նվազեցման։ Այդ մասին գրում է Deutsche Welle-ի ռուսական ծառայությունը։
«Չինաստանը չի կառուցել այս ջրանցքը, Չինաստանը չի վերահսկում այս ջրանցքը և չի օգտագործի այս ջրանցքը որպես զենք», - ասել է Հեգսեթը Վասկո Նունիես դե Բալբոայի անվան տեղի ամերիկյան ռազմաբազայում:
ԱՄՆ-ի պաշտպանության նախարարն «անընդունելի» է համարել, որ Չինաստանից ընկերությունները «շարունակում են վերահսկել կարևորագույն ենթակառուցվածքը ջրանցքի գոտում», քանի որ դա «Չինաստանին հնարավորություն է տալիս լրտեսելու» և տեսնելու, թե ինչ է տեղի ունենում Պանամայում։ Հեգսեթը նշել է, որ Պանամայի իշխանությունների և մյուս գործընկերների հետ միասին ԱՄՆ-ն դուրս կբերի ջրանցքը Չինաստանի ազդեցությունից և այն կբացի բոլոր երկրների համար։
Ելույթի ժամանակ Պենտագոնի ղեկավարը նաև հայտարարել է Պանամայի հետ համագործակցության խորացման մասին։
«Դա ներառում է ԱՄՆ-ի և Պանամայի անվտանգության ուժերի միջև զորավարժությունների անցկացման և տվյալների փոխանակման ավելացում», - հստակեցրել է Հեգսեթը:
Նրա խոսքով՝ դա անհրաժեշտ է մասամբ «կոմունիստական Չինաստանի կողմից էլ ավելի լուրջ մարտահրավերներին արձագանքելու համար»:
Ատլանտյան և Խաղաղ օվկիանոսները կապող Պանամայի ջրանցքն ԱՄՆ-ն կառուցել է 1914 թվականին: Մինչև 1999 թվականը երկիրը վերահսկում էր այդ 82-կիլոմետրանոց ջրային ուղին, իսկ հետո այն ամբողջությամբ հանձնվել է Պանամային։
Հունվարի վերջին Սպիտակ տուն վերադառնալուց հետո ԱՄՆ նախագահ Դոնալդ Թրամփը քանիցս հայտարարել է, որ Վաշինգտոնի համար կարևոր է վերականգնել վերահսկողությունը Պանամայի ջրանցքի նկատմամբ։
Թրամփի խոսքին ի պատասխան՝ Պանամայի նախագահ Խոսե Ռաուլ Մուլինոն հունվարի վերջին հայտարարել էր, որ Պանամայի ջրանցքը «ԱՄՆ-ից նվեր» չէ և կշարունակի պատկանել իր կողմից ղեկավարվող երկրին։
