ԱՄՆ նախագահ Դոնալդ Թրամփը հայտարարել է, որ ատոմային էներգետիկայի ոլորտում Միացյալ Նահանգների և Սաուդյան Արաբիայի միջև կնքվելիք համաձայնագիրը չի նախատեսում թագավորությունում ուրանի հարստացում և չի հետապնդում ռազմական նպատակներ։
Ինչպես Truth Social-ում նշել է ԱՄՆ ղեկավարը, «ԱՄՆ էներգետիկայի նախարարության ու Սաուդյան Արաբիայի միջև կնքվող քաղաքացիական միջուկային էներգետիկայի ոլորտում համաձայնագիրը ունենալու է բացառապես ոչ ռազմական նպատակներ»։ Թրամփը հավելել է, որ «Միացյալ Նահանգները դեմ չէ քաղաքացիական միջուկային էներգետիկայի օբյեկտներին», եթե դրանք չեն օգտագործվում ռազմական կարիքների համար ուրան հարստացնելու նպատակով։
