Թեհրանի քաղաքապետ Ալիռեզա Զաքանին Իրանի նախագահական ընտրություններից հանել է իր թեկնածությունը` հօգուտ պահպանողական թևի երկու այլ թեկնածուների՝ խորհրդարանի նախագահ Մոհամադ Բաղեր Ղալիբաֆի և հանրապետության Անվտանգության խորհրդում հոգևոր առաջնորդի ներկայացուցիչ Սայիդ Ջալիլիի: Այդ մասին հայտնում է ՏԱՍՍ գործակալությունը:
«Ես հասել եմ նախընտրական մրցավազքի ժամկետի վերջին, բայց զոհված նախագահի ուղեգիծը շարունակելն ավելի կարևոր է: Խնդրում եմ Ջալիլիին և Ղալիբաֆին միավորվել, անպատասխան չթողնել հեղափոխության ուժերի օրինական պահանջները և թույլ չտալ Ռոուհանիի երրորդ կառավարության ձևավորումը»,- Զաքանին գրել է X-ի իր էջում։ Հասան Ռոուհանին, որը Իրանի նախագահն է եղել 2013-2021 թվականներին, պատկանում է ռեֆորմիստների թևին:
Իր թեկնածությունը հանած Թեհրանի քաղաքապետը հույս է հայտնել, որ և՛ Ջալիլին, և՛ Ղալիբաֆը հաղթանակի դեպքում «կկանգնեն ճշմարտության և ժողովրդի իրավունքների պաշտպանության կողքին և իրենց գործընկերներին կընտրեն այն անձանցից, որոնք, գերագույն առաջնորդի հրահանգի համաձայն, հավատում են հեղափոխության իդեալներին և մարդկանց բարեպաշտությանը»:
Իրանում արտահերթ նախագահական ընտրությունները նշանակված են հունիսի 28-ին։
