Հայաստանը գտնվում է բարդ աշխարհաքաղաքական իրավիճակում։ Այս մասին դեկտեմբերի 26-ին լրագրողների հետ հանդիպման ժամանակ ասել է Հայ ազգային կոնգրեսից վարչապետի թեկնածու, ՀԱԿ վարչության փոխնախագահ Լեւոն Զուրաբյանը։ Հիշեցնենք, որ կուսակցությունը գլխավորում է Հայաստանի առաջին նախագահ Լեւոն Տեր-Պետրոսյանը։
Ընդդիմության առաջնորդը նշել է, որ այս իրավիճակը լուրջ սպառնալիք է ներկայացնում Հայաստանի պետականության համար։ Երկրի իրավիճակը, ավելացրել է նա, ավելի է սրվում ներքին սպառնալիքի՝ վարչապետ Նիկոլ Փաշինյանի գլխավորած գործող իշխանությունների պատճառով։ «Երկիրը գտնվում է սողացող կապիտուլյացիայի վիճակում։ Ադրբեջանն ամեն օր նոր պահանջներ է ներկայացնում Հայաստանին։ Դա վերաբերում է թե՛ անկլավներին, թե՛ այսպես կոչված «Զանգեզուրի միջանցքին», որի իրականացումը կխաթարի մեր ինքնիշխանությունը, թե՛ 300 հազար ադրբեջանցիների «վերադարձին» այսպես կոչված «Արեւմտյան Ադրբեջան», թե՛ ՀՀ Սահմանադրության փոփոխություններին եւ Հայ Առաքելական եկեղեցու վրա հարձակումներին»,- ասել է Զուրաբյանը։ ՀԱԿ փոխնախագահը փաստել է, որ չնայած Փաշինյանի բոլոր հավաստիացումներին, խաղաղություն չի հաստատվել։ Ի վերջո, Ադրբեջանը, ըստ էության, պայմանագիրը չի ստորագրել։ «Հայաստանը կանգնած է ադրբեջանացման սպառնալիքի առջեւ՝ աստիճանաբար դառնալով Ադրբեջանին ենթակա երկիր։ Բացի այդ, ավտորիտար Ադրբեջանի բարքերը աստիճանաբար սկսում են թափանցել մեր ներքաղաքական կյանք»,- ընդգծել է Տեր-Պետրոսյանի դաշնակիցը։
Ավելին՝ տեսանյութում։
