Պապուա Նոր Գվինեայի մայրաքաղաքում համատարած անկարգությունների ժամանակ առնվազն 10 մարդ է զոհվել, տասնյակ մարդիկ վիրավորվել են։ Այս մասին հաղորդել է Radio New Zealand- ը:
Ըստ աղբյուրի՝ չորեքշաբթի օրը Պորտ Մորսբիում անկարգություններ են տիրել տեղի ոստիկանության, զինվորականների և ուղղիչ սպաների կողմից կազմակերպված գործադուլի ֆոնին: Տասնյակ տուժածներ տեղափոխվել են հիվանդանոցներ:
Ինչպես նշում է ռադիոն, «հարյուրավոր կողոպտիչներ, օգտվելով ոստիկանության ցույցից», դուրս են եկել մայրաքաղաքի փողոցներ և սկսել թալանել ու հրկիզել խանութները։ Տեղի բնակիչների կողմից սոցցանցերում հրապարակված տեսանյութերը ցույց են տալիս, որ մարդկանց ամբոխը դատարկում է խանութներից այն ամենը, ինչ կարող էր՝ սկսած ալյուրի և բրնձի պարկերից մինչև սառնարաններ և սառցարաններ: Փողոցներում կարգուկանոն հաստատելու համար երկրի իշխանությունները Պորտ Մորսբի են ուղարկել այլ նահանգներից ոստիկաններ և զինվորականներ՝ խոստանալով նրանց թույլ տալ մարտական զինամթերք օգտագործել կողոպտիչների դեմ։
Իրավապահները գործադուլ են հայտարարել «աշխատավարձից անբացատրելի պահումների» պատճառով։ Պապուա Նոր Գվինեայի վարչապետ Ջեյմս Մարապեն ավելի ուշ ասաց, որ պահումները առաջացել են կառավարության աշխատավարձային համակարգում անսարքության պատճառով և կփոխհատուցվեն հաջորդ ամիս:
