Գազայի ալ-Ահլի ալ-Արաբի հիվանդանոցում տեղի ունեցած պայթյունը, որի հետևանքով հարյուրավոր մարդիկ են զոհվել, բողոքի ցույցեր է առաջացրել արաբական աշխարհում և նրա սահմաններից դուրս, գրում է The Guardian-ը։
Լիբանանի Հեզբոլլահը կոչ է արել «զայրույթի օր» նշանակել, որը համընկնում է ԱՄՆ նախագահ Ջո Բայդենի՝ տարածաշրջան ժամանելու հետ։ Բեյրութի մերձակայքում գտնվող Ավքար արվարձանում ԱՄՆ դեսպանատան մոտ հարյուրավոր ցուցարարներ բախվել են լիբանանյան անվտանգության ուժերի հետ, որտեղ ցուցարարները քարեր են նետել և այրել մոտակա շենքը, հաղորդում է Agence France-Presse-ը:
Ոստիկանությունը արցունքաբեր գազ է կիրառել ցուցարարներին ցրելու համար։ Ըստ AFP-ի՝ ցուցարարները վանկարկել են «Մահ Ամերիկային» և «Մահ Իսրայելին»։ Հարյուրավոր մարդիկ հավաքվել են նաև Բեյրութում Ֆրանսիայի դեսպանատան մոտ՝ բարձրացնելով Հըզբոլլահի դրոշները և քարեր նետելով դեսպանատան գլխավոր մուտքի մոտ։
Չորեքշաբթի վաղ առավոտյան ԱՄՆ Պետդեպարտամենտը հորդորել է ամերիկացիներին խուսափել Լիբանան մեկնելուց՝ միաժամանակ թույլ տալով կամավոր ժամանակավոր հեռանալ ԱՄՆ կառավարության աշխատակիցների ընտանիքի անդամներին:
Հորդանանի մայրաքաղաք Ամմանում ցուցարարները փորձել են ներխուժել Իսրայելի դեսպանատուն։ Ոստիկանությունը արցունքաբեր գազ է կիրառել մի քանի հազար ցուցարարներին ցրելու համար, որոնք վանկարկում էին ՀԱՄԱՍ-ի աջակցության կարգախոսներ և կառավարությունից պահանջում էին փակել դեսպանատունը և հրաժարվել Իսրայելի հետ խաղաղության պայմանագրից։
Թեհրանում հարյուրավոր ցուցարարներ հավաքվել են Մեծ Բրիտանիայի և Ֆրանսիայի դեսպանատների մոտ չորեքշաբթի վաղ առավոտյան: Ցուցարարները բղավել են «Մահ Ֆրանսիային և Անգլիային» եւ ձվեր են նետել Իրանի մայրաքաղաքում Ֆրանսիայի դեսպանատան պատերի վրա։
Լիբիայում հարյուրավոր ցուցարարներ՝ բոլոր տարիքի, ծածանելով պաղեստինյան դրոշները, իսկ ոմանք՝ իրենց դեմքերը ծածկելով պաղեստինյան քեֆիեներով, երթով անցել են Տրիպոլիի փողոցներով, ապա հավաքվել Նահատակների հրապարակում: Նրանք կարգախոսներ են վանկարկել՝ ի պաշտպանություն Գազայի ժողովրդի։
Բողոքի ցույցեր են տեղի ունեցել Եմենի հարավ-արևմուտքում գտնվող Թազ քաղաքում, ինչպես նաև Մարոկկոյի մայրաքաղաք Ռաբաթում և Բաղդադում։
Թուրքիայի նախագահ Ռեջեփ Թայիփ Էրդողանն ասել է, որ Գազայի հիվանդանոցի ռմբակոծությունը «մարդկային ամենահիմնական արժեքներից զուրկ իսրայելական հարձակումների վերջին օրինակն է», երբ ցուցարարների մեծ բազմություն հավաքվել էր Անկարայում Իսրայելի դեսպանատան և Ստամբուլում հյուպատոսության մոտ:
Երեքշաբթի ուշ երեկոյան Պաղեստինի անվտանգության ուժերի հետ բախումներ են տեղի ունեցել Հորդանան գետի Արևմտյան ափի մի քանի քաղաքներում: Պաղեստինի անվտանգության ուժերը Ռամալլահում արցունքաբեր գազ և լուսաձայնային նռնակներ են կիրառել՝ ցրելու ցուցարարներին, որոնք քարեր էին նետում և կարգախոսներ վանկարկում Պաղեստինի նախագահ Մահմուդ Աբասի դեմ: Աբասը վերադառնում էր Արևմտյան ափ այն բանից հետո, երբ չեղարկվել էր Հորդանանում Բայդենի հետ նախատեսված հանդիպումը։
Հարյուրավոր ցուցարարներ երթով անցել են Ռամալլայի կենտրոնական Մանարա հրապարակով, ոմանք աջակցել են ՀԱՄԱՍ-ի զինյալների առաջնորդներին:
Հաղորդվում է, որ բախումներ պաղեստինյան անվտանգության ուժերի հետ տեղի են ունեցել նաև Հորդանան գետի արևմտյան ափի Նաբլուս, Տուբաս և Ջենին քաղաքներում:
Վերլուծաբաններն ասում են, որ Հորդանան գետի Արևմտյան ափում բողոքի ցույցերի բռնկումը ընդգծել է պաղեստինցիների վաղուց բորբոքված զայրույթը Աբասի դեմ, որը երկար ժամանակ քննադատության էր ենթարկվում այդ տարածքում անվտանգության հարցերը Իսրայելի հետ համակարգելու համար:
