Եվրոպական բաժնետոմսերը շաբաթն սկսել են անկմամբ

Արևմտյան Եվրոպայի երկրների ֆոնդային ինդեքսները երկուշաբթի օրվա առևտուրն ավարտել են կտրուկ անկմամբ՝ Ֆրանսիայում տեղի ունեցած անկարգությունների պատճառով։

Տարածաշրջանի խոշորագույն ընկերությունների Stoxx Europe 600 հավաքական ինդեքսը նվազել է 0,8%-ով՝ հասնելով 639,56 կետի։

Բրիտանական FTSE 100-ը կորցրել է 1,1%, գերմանական DAX-ը՝ 1,2%, ֆրանսիական CAC 40-ը՝ 1,1%, իտալական FTSE MIB-ը՝ 1,6%, իսկ իսպանական IBEX 35-ը՝ 1,5%։

Ներդրողների տրամադրությունների վրա բացասաբար է անդրադարձել Ֆրանսիայում ստեղծված իրավիճակը, որտեղ կյանքի թանկացման դեմ անցած հանգստյան օրերին տեղի ունեցած համազգային բողոքի ցույցերը վերածվել են զանգվածային անկարգությունների, ավերածությունների և կողոպուտների։ Այդ գործողությունների հետևանքով երկրի տնտեսությանը հասցված վնասը գնահատվում է հարյուրավոր միլիոն եվրո։

Ֆրանսիական BNP Paribas և Societe Generale բանկերի բաժնետոմսերն էժանացել են համապատասխանաբար 3,4%-ով և 2,6%-ով, Accor հյուրանոցային ցանցի օպերատորի արժեթղթերի գինը նվազել է 3%-ով, Engie էներգետիկ ընկերությանը՝ 2,8%-ով, Orange կապի օպերատորինը՝ 2,5%-ով, իսկ Carrefour սուպերմարկետների ցանցինը՝ 2,2%-ով։

Stoxx 600 ինդեքսում ընդգրկված ընկերությունների շրջանում անկման առաջատարը դարձել է Aker ASA ներդրումային ընկերությունը (-7,1%)։

Զգալիորեն նվազել է պաշտպանական ոլորտի կապալառու ընկերությունների շուկայական արժեքը (կապիտալիզացիան), այդ թվում՝ Thales-ինը (-0,8%), Babcock International-ինը (-1,2%), BAE Systems-ինը (-1,6%), Leonardo-ինը (-2,2%), CSG-ինը (-2,7%) և Rheinmetall-ինը (-2,8%)։

Էժանացել են ավտոարտադրողների՝ Stellantis-ի (-3,2%), Renault-ի (-1,5%) և Mercedes-Benz-ի (-0,8%) բաժնետոմսերը։

Անկմամբ են փակվել նաև եվրոպական բանկերի բաժնետոմսերը, մասնավորապես՝ Barclays-ինը (-3,5%), Deutsche Bank-ինը (-2,8%), Standard Chartered-ինը (-2,3%), UniCredit-ինը (-2,2%) և Commerzbank-ինը (-2,1%)։

Շվեյցարական շոկոլադ արտադրող Lindt & Spruengli-ի արժեթղթերի արժեքը նվազել է 0,8%-ով այն բանից հետո, երբ հայտնի է դարձել ընկերության գլխավոր գործադիր տնօրեն Ադալբերտ Լեխների անհապաղ հրաժարականի մասին։ Ընկերության ղեկավարի պարտականությունները ժամանակավորապես կկատարի Դիտեր Վայսկոպֆը, որը Lindt-ի գլխավոր տնօրենի պաշտոնը զբաղեցրել է մինչև 2022 թվականը։ «Տնօրենների խորհուրդը եկել է այն եզրակացության, որ կայուն և դինամիկ աճին վերադառնալու համար ընկերությանն անհրաժեշտ է նոր օպերացիոն ղեկավարություն», - ասված է Lindt-ի հայտարարության մեջ։ Անցած ամիս ընկերությունը ցածր պահանջարկի ֆոնին այս տարի արդեն երկրորդ անգամ վատթարացրել էր վաճառքի տարեկան կանխատեսումը։

Հավաքական ինդեքսում աճի առաջատարների թվում է հայտնվել նորվեգական Mowi-ն (+3,5%)։ Սաղմոն արտադրող ընկերությունն ավելի վաղ հայտնել էր երրորդ եռամսյակում գրանցված ռեկորդային որսի մասին։

Ակտիվ աճ են գրանցել ALK-Abello-ի և Comet Holding-ի (+4,2%), Nemetschek-ի (+3,7%), Allegro.eu-ի (+3,5%), BE Semiconductor Industries-ի (+3,4%), Wolters Kluwer-ի (+3,2%) և Zalando-ի (+2,6%) բաժնետոմսերի գնանշումները։

Դրական դինամիկա են ցուցաբերել նաև նավթային ընկերությունների՝ Equinor-ի (+0,6%), BP Plc-ի (+0,4%), Eni-ի (+0,7%) և Repsol-ի (+0,6%) բաժնետոմսերը։