Չինաստանը հզոր հակաքայլեր է պատրաստել ամերիկյան ընկերությունների դեմ, եթե ԱՄՆ-ի հետ առևտրային հակամարտությունը վատթարանա Դոնալդ Թրամփի նոր վարչակազմի օրոք։ Այս մասին հայտնում է Financial Times (FT) թերթը՝ հղում անելով աղբյուրներին։
Պեկինը, ըստ հրապարակման, պատրաստ չէր Սպիտակ տան կտրուկ քայլերին Թրամփի նախագահության առաջին շրջանում՝ ավելի բարձր մաքսատուրքերի սահմանում, ներդրումների նկատմամբ վերահսկողության խստացում և չինական ընկերությունների դեմ պատժամիջոցներ։ Սակայն, ութ տարիների ընթացքում Չինաստանը վճռական օրենսդրական միջոցներ է ձեռնարկել, որոնք «թույլ են տալիս սև ցուցակում ներառել օտարերկրյա ընկերություններին, պատժամիջոցներ կիրառել նրանց նկատմամբ և սահմանափակել Ամերիկայի մուտքը կարևոր մատակարարման շղթաներ», - ասվում է հրատարակության մեջ:
Չինաստանն այժմ ունի հակաօտարերկրյա պատժամիջոցների մասին օրենքը, որը թույլ է տալիս նրան պայքարել այլ երկրների կողմից ձեռնարկված միջոցների, ինչպես նաև արտասահմանում «անվստահելի կազմակերպությունների ցանկի» դեմ, որոնք խաթարում են ազգային շահերը: Կանոնակարգեր են ներմուծվել՝ կարգավորելու երկակի նշանակության ապրանքների արտահանումն ի պատասխան «որոշ օտարերկրյա պետությունների և կազմակերպությունների» գործողություններին, որոնք «օգտագործելով տարբեր պատրվակներ՝ կապված Սինցզյանի, Տիբեթի, Հոնկոնգի, Թայվանի հետ, նսեմացնում, հարձակվում և խեղաթյուրում են Չինաստանի զարգացումը՝ ձգտելով զսպել այն և ճնշել»:
«Սա երկկողմանի գործընթաց է։ Չինաստանը, իհարկե, կփորձի ցանկացած միջոցներով շփվել նախագահ Թրամփի հետ, կփորձի բանակցել», - մեջբերում է հրատարակությունը Պեկինի համալսարանի Գլոբալ համագործակցության և փոխըմբռնման ինստիտուտի գործադիր տնօրեն Վան Դոնգին։ «Բայց եթե բանակցությունների միջոցով ոչինչ հնարավոր չէ հասնել, ինչպես եղավ 2018 թվականին, և մենք պետք է պայքարենք, մենք վճռականորեն կպաշտպանենք Չինաստանի իրավունքներն ու շահերը»:
