Իրանի զինված ուժերի գլխավոր շտաբի պետ Մոհամմադ Բաղերին Ադրբեջանին մեղադրել է իսլամական աշխարհին դավաճանելու մեջ։ Այս մասին հայտարարել է Զինված ուժերի հրամանատարը բանակային ռազմաօդային ուժերի առաջին ստորգետնյա բազայի՝ «Օգաբ-44»-ի բացման արարողության ժամանակ, հայտնում է ISNA-ն։
«Սիոնիստական ռեժիմը հեռու է մեր երկրից, և նրանց ուղղաթիռները պետք է օդում լիցքավորվեն, սա լավագույն հնարավորությունն է՝ թիրախավորելու այդ ինքնաթիռները։ Փորձում են օգտվել նաեւ մեր հարեւան երկրների բազաներից։ Այս երկրները բռնել են իսլամական աշխարհին դավաճանելու ճանապարհը՝ հարաբերություններ հաստատելով Սիոնիստական ռեժիմի հետ՝ չիմանալով, որ այդ հարցը ներառված է Իրանի ռազմավարության մեջ»,- ասել է Բաղերին՝ նկատի ունենալով Ադրբեջանին, որն իր օդանավակայաններն է տրամադրել Իսրայելին։
Նա ընդգծել է, որ Իրանի ռազմական դոկտրինը ենթադրում է, որ եթե աշխարհի որևէ երկրի ռազմաբազա օգտագործվի Իրանի վրա հարձակվելու համար, ապա այդ բազաները նույնպես կենթարկվեն զանգվածային հարվածի։
