Գազայի հատվածում զինադադարը կախված է ինչպես պաղեստինյան արմատական ՀԱՄԱՍ շարժումից, այնպես էլ Իսրայելից, ԱՄՆ-ն հուսով է առաջիկա օրերին նրանցից այս հարցի վերաբերյալ վերջնական պատասխան ստանալ։ Այդ մասին հայտարարել է ԱՄՆ պետքարտուղար Էնթոնի Բլինքենը՝ Հայիթի կատարած այցից հետո Պորտ-օ-Պրենսում կայացած մամուլի ասուլիսում։
«Այս պահին ինձ թվում է, որ երկու կողմերն էլ պետք է համաձայնության գան այս մնացած հարցերի շուրջ, և մենք շատ ակտիվ բանակցություններ ենք վարում առաջին հերթին մեր գործընկերների՝ Եգիպտոսի և Կատարի հետ», - ասել է նա՝ պատասխանելով հարցին, թե Վաշինգտոնը որտեղ է դնում զինադադարի հասնելու համար հիմնական պատասխանատվությունը։ «Եվ ես ակնկալում եմ, որ առաջիկա օրերին մենք կկիսվենք մեր մտքերով Իսրայելի և ՀԱՄԱՍ-ի հետ, մենք երեքով կքննարկենք, թե ինչպես լուծել մնացած չլուծված խնդիրները», - հավելել է պետքարտուղարը:
