ԱՄՆ նախագահ Ջո Բայդենը շնորհավորել է Նիգերին Անկախության օրվա առթիվ և կոչ է արել անհապաղ ազատ արձակել հեղաշրջում իրականացրած զինվորականների կողմից պահվող նախագահ Մոհամեդ Բազումին։ Այս մասին հայտարարություն է տարածել Սպիտակ տան մամուլի ծառայությունը։
Բայդենը նշել է, որ Նիգերի ժողովուրդն ընտրությունների միջոցով արդեն արտահայտել է կամքը։
«Այս տարի Նիգերը նշում է իր անկախության 63-րդ տարեդարձը և բախվում է ժողովրդավարության լուրջ մարտահրավերի... Նիգերի ժողովուրդն իրավունք ունի ընտրելու իր առաջնորդներին։ Նրանք իրենց կամքն արտահայտել են ազատ և արդար ընտրությունների միջոցով, և դա պետք է հարգվի», - գրված է հաղորդագրությունում։
Ըստ Բայդենի՝ Նիգերի նախագահը և նրա ընտանիքը պետք է ազատ արձակվեն։
«Կոչ եմ անում անհապաղ ազատ արձակել նախագահ Բազումին ու նրա ընտանիքին, ինչպես նաև պահպանել Նիգերում դժվարությամբ ձեռք բերված ժողովրդավարությունը», - ասվում է Բայդենի հայտարարության մեջ։
Նիգերում Անկախության օրը նշվում է օգոստոսի 3-ին․ 1960 թվականին այս օրը Նիգերը, որ մինչ այդ Ֆրանսիայի գաղութ էր, անկախություն ձեռք բերեց։
