ԱԺ «Հայաստան» խմբակցության պատգամավոր Գեղամ Մանուկյանը Կառավարության հետ հարցուպատասխանի ժամանակ մեջբերեց Նիկոլ Փաշինյանի 2019 և 22 թթ ուղերձներից հատվածներ, որտեղ նա խոսել էր Ղարաբաղյան շարժման մասին և համարել վերջին հարյուրամյակների միակ ազգային շարժումը։
«Մինչև հարցիս պատրաստվելը գնացի, փորձեցի նոթագրեմ՝ ինչ է Ղարաբաղյան շարժումը։ Ղարաբաղյան շարժումը շրջադարձային նշանակություն ունեցավ հայ ժողովրդի հետագա պատմության համար, այն բացառիկ է իր հզորությամբ, խորապես ազգային է և ժողովրդավար։ Շարժումը մեր պետականության վերականգման առաջին քայլը հանդիսացավ, որով վերագտանք ազատ և անկախ ապրելու, մեր ճակատագիրը կերտելու վճռականությունը»,–մեջբերեց Գեղամ Մանուկյանը։
Նիկոլ Փաշինյանն էլ ի պատասխան հայտարարեց.
«Եթե դուք իմ ուղերձներն եք մեջբերում, ես ավելի կարևոր բան ասեմ՝ իմ կյանքի առաջին ցույցին մասնակցել եմ 1988 թվականին, երբ եղել եմ 7-րդ կամ 8-րդ դասարանում։ Հենց դրա մասին է խոսքը, այնպես չի, որ մենք ուրիշ միջավայրից եկել ենք, ու ուրիշ բան ենք ասում։ Բա մեր անցած ճանապարհն ա, պիտի հետ նայենք, վերլուծենք, դա էլ է կրթության մաս»։
Նիկոլ Փաշինյանին բարկացրեց Գեղամ Մանուկյանի ՝ «ուրիշներին կրթվելու դասեր տալու փոխարեն ինքներդ կրթվե՛ք» կոչը։
«Ես ուրիշներին կոչ չեմ անում, ինքս ինձ եմ անում, և իմ կրթության արդյունքներն եմ ձեզ ներակայացնում այս հարցերի արձանագրման համատեքստում։ Այդ ուղերձներն իմ կայքում դրված են։ Դա ինչի՞ մասին է խոսում։ Այո՛, մենք Ղարաբաղյան շարժումը չենք շարունակելու, ուզում եք թռեք վերև, իջեք ցած։ Եվ քանի ես ՀՀ վարչապետն եմ, սա ՀՀ պաշտոնական դիրքորոշումն է։ Եթե Հայաստանի ժողովուրդը համաձայն չլինի իմ այս դիրքորոշման հետ, դուք կդառնաք վարչապետ»,–ասաց նա։
