Երեկ օրվա առաջին կեսին ՀՀ ԶՈՒ ԳՇ-ն և տասնյակ բարձրաստիճան զինվորականներ հայտարարեցին, որ պահանջում են վարչապետ Նիկոլ Փաշինյանի և կառավարության հրաժարականը: ԳՇ այս հայտարարությունը իրական փոթորիկ էր և հասկանալի էր բոլորի համար, որ կտրուկ փոփոխություններ են սպասվում Հայաստանում: Միջազգային գործընկերների արձագանքն, ըստ ամենայնի, հենց այս տրամաբանության շրջանակում էր:
Առաջին արձագանքն իհարկե ռազմավարական դաշնակից Ռուսաստանի Դաշնությունից էր: ՌԴ նախագահի մամուլի խոսնակ Պեսկովը РИА Новости-ի հետ զրույցում անդրադառանալով Հայաստանում տեղի ունեցող իրադարձություններին ասել էր.«Մենք կարծում ենք, որ դա բացառապես Հայաստանի ներքին գործն է՝ Կովկասում մեր շատ կարեւոր եւ մտերիմ դաշնակցի»:
Հաջորդ արձագանքը եղավ ԱՄՆ-ից: Հայաստանում ԱՄՆ դեսպանությունը հայտարարություն տարածեց, որում մասնավորապես ասվում է. «Մենք բոլոր կողմերին խրախուսում ենք հանդես բերել հանգստություն, զսպվածություն և խաղաղ ու առանց բռնության թուլացնել լարվածությունը։ Միացյալ Նահանգները, մեր ընդհանուր արժեքներին համահունչ սատարելով Հայաստանի ժողովրդավարական բարեփոխումներին, շեշտում է ժողովրդավարական հաստատությունների և գործընթացների կարևորությունը քաղաքական տարաձայնությունները երկխոսությամբ կարգավորելու ճանապարհին»։
Ինչպես տեսնում ենք երկու գերտերությունների արձագանքն էլ բավական զուսպ է և առնվազն հրապարակային որևէ կողմին աջակցություն չի հայտնվում: Զուսպ էր նաև ԵԽԽՎ կոչը, որը ըստ էության ևս իրավիճակի ճիշտ գնահատական կարելի է համարել:
Երեկ արտաքին ուժերից միայն Թուրքիան է հստակ ընդգծված աջակցություն հայտնել Նիկոլ Փաշինյանի իշխանութանը: Նախ հայտարարությամբ հանդես եկավ Թուրքիայի ԱԳ նախարար Չավուշօղլուն: Նա մասնավորապես ասել էր. «Թուրքիան դատապարտում է Հայաստանում տեղի ունեցող հեղաշրջումը»:
Հետո հայտարարությամբ հանդես եկավ Թուրքիայի նախագահ Էրդողանի մամուլի խոսնակ Իբրահիմ Քալընը:Նա հայտարարել է, որ որպես Թուրքիայի պետական ծառայող դատապարտում է Հայաստանում ռազմական հեղաշրջման փորձը։ Նա հույս է հայտնել, որ Հայաստանում իրավիճակն արագ կկարգավորվի։
Առաջին հայացքից կարելի է կարծել, որ Թուրքիան իր աջակցությունը հայտնելով Փաշինյանին փորձում է շիկացնել մթնոլորտը Հայաստանում, սակայն իրականությունն այն է, որ թուրքական պետությունը լծվել է Փաշինյանի հեռացնելու գործը տապալելուն: Երեկվանից թուրքական ամբողջ մեդիան ներկայացնում է միայն Հայաստանի կառավարության տեսակետները, պիտակավորվում են հայկական բանակի գեներալները և փորձ է արվում միջազգային հանրության աչքերում ԳՇ-ն, որպես խունտա ներկայացնել:
