ԱՄՆ նոր վարչակազմի քաղաքականությունը Չինաստանի հետ արտաքին առեւտրի եւ հարկերի ու դրույքաչափերի հարցում կարող է բացասական ազդեցություն ունենալ Թուրքիայի եւ տարածաշրջանային շուկայի վրա։ Նման կարծիք է հայտնել Dünya տնտեսական պարբերականը։
ԱՄՆ նորընտիր նախագահ Դոնալդ Թրամփը ավելի վաղ հայտարարել էր, որ կարող է Չինաստանից ներմուծման մաքսատուրքերը բարձրացնել մինչեւ 50 եւ 20 տոկոս բոլոր այլ ներմուծումների համար: Հրատարակությունը նշում է, որ, ամենայն հավանականությամբ, նման իրավիճակում «ամերիկյան ընկերությունները կվերակազմավորեն իրենց մատակարարման շղթաները այն երկրների շուրջ, որոնք ավելի ցածր սակագներ ունեն»։ Միաժամանակ, վտանգ կա, որ Եվրոպան կպատասխանի ԱՄՆ բարձր մաքսատուրքերին, եւ կստեղծվի հակաամերիկյան առեւտրային ինչ-որ բլոկ։ Սակայն սպառնալիք է մնում այն, որ Չինաստանը ԱՄՆ-ում չվաճառվող իր արտադրանքը կուղղորդի այլ շուկաներ, այդ թվում՝ Թուրքիա, ագրեսիվ կերպով ճնշում գործադրելով եւ լուրջ մրցակցություն ստեղծելով տեղի տնտեսությունների համար:
Թրամփի ֆիսկալ քաղաքականությունը, ինչպես գրել է Dünya-ն, ռիսկեր է պարունակում նաեւ մի շարք երկրների, այդ թվում՝ Թուրքիայի համար։ Նրա խոստացած հարկերի կրճատումն ուղղված է ԱՄՆ ներսում տնտեսական աճի խթանմանը, բայց միեւնույն ժամանակ բյուջեի դեֆիցիտը մեծացնելուն։ Ենթադրվում է, որ դրա դեմն առնելու են պետական պարտատոմսերի թողարկումն ու տոկոսադրույքների բարձրացումը: Տոկոսադրույքների բարձրացումը նշանակում է զարգացող երկրների, այդ թվում՝ Թուրքիայի համար արտաքին փոխառությունների ծախսերի աճ, գրել է թերթը։ Այս իրավիճակը, զուգորդված դոլարի ամրապնդման հետ, կարող է բացասաբար ազդել հանրապետության տնտեսության հավասարակշռության վրա։ Մինչդեռ այդ միջոցառումների էֆեկտը կհետաձգվի մինչեւ 2026թ.՝ կապված այն բանի հետ, որ բյուջեում ներառված է պարտատոմսերի թողարկումը, որի հաստատումը երկար ժամանակ է պահանջում։
Dünya-ն նշել է, որ թուրքական հանրության շրջանում լավատեսական ակնկալիքներ կան Թրամփի ղեկավարության ժամանակաշրջանի վերաբերյալ, սակայն դա «վտանգավոր լավատեսություն է»։ Թերթը կոչ է արել հիշել «անհամապատասխանությունները Թրամփի խոստումների առաջին ժամկետում եւ դրանց իրականացման միջեւ», ինչպես նաեւ Թրամփի անսպասելի քայլերը, որոնք կարող են «շրջել ֆինանսական շուկաները եւ դիվանագիտականհարաբերությունները»: Այս առնչությամբ պարբերականը կոչ է արել զգույշ լինել Թրամփի երկրորդ ժամկետի հեռանկարները գնահատելիս, քանի որ դրանք մնում են բավական անորոշ։
