2024թ. ՀՀ Լոռու եւ Տավուշի մարզերի հեղեղումներից տուժած տնտեսվարող սուբյեկտներին տրամադրվել է 181 մլն դրամի աջակցություն։ Այս մասին հունիսի 9-ին հայտնել է հանրապետության էկոնոմիկայի նախարար Գեւորգ Պապոյանը՝ մշտական խորհրդարանական հանձնաժողովների համատեղ նիստում, «ՀՀ 2024թ. պետական բյուջեի կատարման մասին» տարեկան հաշվետվության քննարկման ժամանակ։ Նրա խոսքով՝ աջակցությունը տրամադրվել է 155 շահառուի։ Այնուամենայնիվ, օգնությունը շարունակում է տրամադրվել, քանի որ բիզնեսի մի շարք ներկայացուցիչների հնարավորություն է տրվել վերստուգել իրենց փաստաթղթերը՝ դրանք կրկին ներկայացնելու համար։ «ՀՀ էկոնոմիկայի նախարարությունը նաեւ միջոցառումներ է իրականացրել՝ արտակարգ իրավիճակի հետեւանքով աղետի գոտի հայտարարված տարածքներում, ծրագրից դուրս գտնվող տնտեսվարող սուբյեկտներին աջակցություն ցուցաբերելու համար»,- նշել է Պապոյանը։ Հիշեցնենք, որ ՀՀ Տավուշի եւ Լոռու մարզերում արտակարգ իրավիճակ է ստեղծվել 2024թ. մայիսի 25-26-ին տեղացած ուժեղ անձրեւների, ինչպես նաեւ Դեբեդ, Աղստեւ եւ Տաշիր գետերի վարարման հետեւանքով։ Բնական աղետը խլել է 4 մարդու կյանք։ Ավելի քան 440 մարդ փրկվել եւ տարհանվել է։ Հեղեղումներից տուժած բնակավայրերը հայտարարվել են աղետի գոտիներ։
