Ավստրալիան չեղարկել է Իսրայելի վարչապետ Բենիամին Նեթանյահուի կառավարող կոալիցիայի անդամ, իսրայելցի պատգամավոր Սիմչա Ռոթմանի վիզան։ Օրենսդիրը հայտնի է Պաղեստինի Պետության գոյության դեմ իր ելույթներով և կոչերով՝ Իսրայելին անեքսիայի ենթարկել օկուպացված Արևմտյան ափը։
Ռոթմանն այս ամիս պետք է այցելեր Սիդնեյ և Մելբուրն՝ Ավստրալիայի հրեական ասոցիացիայի հրավերով։
Ավստրալիան հայտարարել էր, որ սեպտեմբերին մտադիր է պաշտոնապես ճանաչել Պաղեստինի Պետությունը, ինչը Ռոթմանն անվանել էր «լուրջ սխալ և հսկայական պարգև Համասի և ահաբեկչության համար»։
Այս հայտարարությունից հետո իսրայելցի օրենսդիրի հետ կապվել են և տեղեկացրել, որ իր վիզան Ավստրալիայի կառավարության կողմից չեղարկվել է վիճահարույց և սադրիչ համարվող հայտարարությունների պատճառով։
Ավստրալիայի ներքին գործերի նախարար Թոնի Բուրկը հայտնել է, որ կառավարությունը կոշտ դիրքորոշում է որդեգրել նրանց նկատմամբ, ովքեր ձգտում են պառակտում սերմանել Ավստրալիայում, և որ ատելության և բաժանման ուղերձ տարածելու համար եկող ոչ ոքի մուտքը ողջունելի չէ իրենց երկրում։
