ԱՄՆ պետքարտուղար Մարկո Ռուբիոն հայտարարել է, որ հակամարտության ավարտից հետո Ուկրաինան իրավունք ունի անվտանգության համաձայնագրեր կնքել ոչ միայն ԱՄՆ-ի և եվրոպական երկրների հետ։ ԱՄՆ պետքարտուղար Մարկո Ռուբիոն այս մասին ասել է Fox News-ին տված հարցազրույցում։
Ամերիկյան դիվանագիտության ղեկավարը նշել է, որ աշխարհի ցանկացած ինքնիշխան երկիր իրավունք ունի պաշտպանական դաշինքներ կնքել այլ երկրների հետ։ Եվ դա վերաբերում է ոչ միայն ՆԱՏՕ-ին. ԱՄՆ-ն նման դաշինքներ ունի Հարավային Կորեայի և Ճապոնիայի հետ, իսկ առանձին երկրներ էլ նման դաշինքներ են կնքում միմյանց հետ։
«Եվ այդ պատճառով բոլորը ընդունում են, Թրամփի ճնշման կամ առաջարկի ներքո նույնիսկ ռուսական կողմն է առաջին անգամ ընդունում, որ Ուկրաինան հակամարտության ավարտից հետո իրավունք ունի անվտանգության համաձայնագրեր կնքել այլ երկրների հետ», - ասել է Ռուբիոն։
Նա նշել է, որ Միացյալ Նահանգները ներկայումս համակարգում է դիրքորոշումները իր եվրոպական և ոչ եվրոպական դաշնակիցների հետ՝ նման անվտանգության երաշխիքներ ստեղծելու համար։
«Սա կլինի այն տարրը, որը պետք է ապահովվի խաղաղության համաձայնագրից հետո, որպեսզի Ուկրաինան ապագայում իրեն պաշտպանված զգա», - նշել է պետքարտուղարը։
Ռուբիոն համոզված է, որ Ուկրաինայի անվտանգության ամենաուժեղ երաշխիքը հզոր բանակն է։
Նա նաև հավելել է, որ ԱՄՆ-ն այլևս Ուկրաինային անվճար զենք չի տրամադրում՝ այսուհետ եվրոպական երկրները նրան օգնում են զենք գնել և մատակարարել ՆԱՏՕ-ի միջոցով։
