ՆԱՏՕ-ն այս տարվա վերջից կուժեղացնի Բալթիկ ծովում չափազանց կարևոր ստորջրյա ենթակառուցվածքների պաշտպանությունը՝ հնարավոր դիվերսիաները կանխելու համար: Այս մասին տեղեկանում է «Ինտերֆաքս»-ից։
Նշվում է, որ ըստ լեհական PAP գործակալության՝ այս մասին հայտարարվել է Տուրեկում (Լեհաստան) Դաշինքի ռազմածովային հրամանատարության խորհրդաժողովում (MARCOM)։
«Կարևոր տարածքների ավելի լայն և ավելի հստակ հսկողությունը, այդ թվում՝ հակաականային պաշտպանության նավերի օգնությամբ, որոնք հանդերձված են ռոբոտներով և տվիչներով ստորջրյա աշխատանքների համար, կոչված է որպես զսպող գործոն ծառայել հնարավոր դիվերսանտների համար», - ասվում է հաղորդագրության մեջ:
Նաև նշվում է, որ «պաշտպանության ուժեղացման նպատակով մշակվում է նոր ծրագրային ապահովում, որը վերլուծում է կապի ավտոմատ համակարգի տվյալները ծովային փոխադրամիջոցում, արբանյակային պատկերները և ենթակառուցվածքի տվիչների ազդանշանները»: Պլանավորվում է, որ ծրագրային ապահովման առաջին տարբերակի օգտագործումը սկսվելու է դեկտեմբերին:
Խորհրդաժողովում նշվել է, որ «Բալթիկ ծովում ստորջրյա խողովակներն ու մալուխները գտնվում են միջին հաշվով մի քանի տասնյակ մետր խորության վրա և ավելի հեշտությամբ են վնասվում, քան, օրինակ, Միջերկրական ծովում, որտեղ դրանք ընկած են ավելի քան մեկ կիլոմետր խորության վրա»։
Նոյեմբերի 17-ին հայտնի է դարձել, որ վնասվել է Լիտվայի և Շվեդիայի, իսկ հաջորդ օրը՝ Ֆինլանդիայի և Գերմանիայի միջև ստորջրյա մալուխը։
