ՆԱՏՕ-ի առաջին մշտական ռազմածովային խմբի նավերը պլանավորված այցի շրջանակներում այսօր ժամանել են Տալլին: Այդ մասին տեղեկանում ենք «РИА Новости» գործակալությունից:
«Տալլին են ժամանել ՆԱՏՕ-ի 1-ին մշտական ռազմածովային խմբի նավերը՝ Գերմանիայի ռազմածովային ուժերի Brandenburg ֆրեգատը և պորտուգալական Bartolomeu Dias ֆրեգատը: Տալլին այցը թույլ կտա նավերի անձնակազմերին դադար ստանալ՝ հաջորդ առաջադրանքներին պատրաստվելու համար, ինչպես նաև շփվել էստոնացի գործընկերների հետ», - նշվում է Էստոնիայի պաշտպանության ուժերի մամուլի ծառայության հաղորդագրությունում։
Անցյալ անգամ ՆԱՏՕ-ի առաջին մշտական ռազմածովային խմբի նավերն Էստոնիա էին այցելել 2022 թ. նոյեմբերին։
ՆԱՏՕ-ի առաջին մշտական ծովային հակաականային խումբը դաշինքի ռազմածովային ուժերի չորս մշտական խմբերից մեկն է, որի խնդիրն ականների չեզոքացման գործողությունների անցկացումն է: Այս խումբը, որը մտնում է ՆԱՏՕ-ի արագ արձագանքման ուժերի կազմի մեջ, ունակ է արագորեն գործողության վայր ժամանել ցանկացած տարածաշրջանում։ Էստոնիայի ռազմածովային ուժերի նավերը ՆԱՏՕ-ի հակաականային խմբի կազմում գործում են ավելի քան տասը տարի։
ՆԱՏՕ-ի ռազմածովային ուժերի խմբերը գտնվում են մշտական պատրաստության վիճակում: Ռազմածովային նավատորմի խմբավորումներն ունակ են գործողություններ իրականացնել ինչպես խաղաղ, այնպես էլ պատերազմական ժամանակներում և իրենց գործողություններով ապահովել դաշնակիցների ներկայությունը և հակազդման պատրաստության մշտական բարձր մակարդակը։
