Կոլումբիայի համալսարանը Դոնալդ Թրամփի վարչակազմի հետ համաձայնագրի շրջանակներում համաձայնել է վճարել 200 միլիոն դոլարի տուգանք՝ հրեա ուսանողների պաշտպանության անբավարար միջոցառումների մեղադրանքի կապակցությամբ։
Ի պատասխան դրան՝ կառավարությունը համաձայնել է վերադարձնել նախկինում սառեցված 400 միլիոն դոլարի դաշնային դրամաշնորհների ճնշող մեծամասնությունը։ Ինչպես նաև, համալսարանի հայտարարության համաձայն՝ կվերականգնվի «միլիարդավոր դոլարների ընթացիկ և ապագա դրամաշնորհների» հասանելիությունը։
Բացի այդ, համաձայնագրի շրջանակներում համալսարանը պարտավորվել է պահպանել այն օրենքները, որոնք արգելում են դիմորդների ընդունելության ժամանակ հաշվի առնել ռասայական պատկանելությունը, ինչպես նաև կատարել այլ պարտավորություններ՝ ուղղված հակասեմականության և համալսարանական քաղաքում անկարգությունների մակարդակը նվազեցնելուն։
Համալսարանի ղեկավարությունը իր հայտարարության մեջ չի ընդունում իրեն վերագրվող իրավախախտումները, սակայն նշում է, որ հրեական ծագում ունեցող ուսանողներն ու դասախոսները «բախվել են ցավալի և անընդունելի միջադեպերի» և որ բարեփոխումը «եղել է և մնում է անհրաժեշտ»։ Կոլումբիայի համալսարանի նախագահի պաշտոնակատար Քլեր Շիփմանը կառավարության հետ կնքված համաձայնագիրն անվանել է «կարևոր քայլ դեպի առաջ՝ դաշնային մշտական հսկողության և ինստիտուցիոնալ անորոշության շրջանից հետո»
Տուգանքի վճարումը նախատեսված է երեք տարվա համար։ Բացի այդ, Կոլումբիայի համալսարանը 21 միլիոն դոլար կվճարի ԱՄՆ-ի աշխատանքի տեղավորման հավասար հնարավորությունների հանձնաժողովի հետաքննությունները կարգավորելու համար։ Համաձայնագիրը կվերահսկվի անկախ դիտորդի կողմից, որը համաձայնեցված կլինի երկու կողմերի միջև։ Նա կառավարությանը հաշվետվություն կներկայացնի յուրաքանչյուր կիսամյակ։
2025 թվականին Դոնալդ Թրամփի կողմից նախագահի պաշտոնը ստանձնելուց հետո՝ նրա վարչակազմը զրկել է Կոլումբիայի համալսարանն ամբողջությամբ 400 միլիոն դոլարի չափով դաշնային ֆինանսավորումից՝ հակասեմականության մեղադրանքների հիման վրա։ Դրանից հետո համալսարանը կիրառել է մի շարք սահմանափակող միջոցառումներ։ Դրանց թվում են եղել համալսարանի տարածքում պատերազմի պատճառով Գազայի հատվածում անցկացվող բողոքի ակցիաների ժամանակ ճամբար կազմակերպած ուսանողների նկատմամբ կարգապահական միջոցները, ցույցերի ընթացքում դիմակներ կրելու արգելքը, ուսանողական խմբերի նկատմամբ վերահսկողության ուժեղացումը և համալսարանի տարածքում ոստիկանական անձնակազմի թվաքանակի ավելացումը։
