Ճապոնիայի գաղութատիրությունից Կորեական թերակղզու ազատագրման 80-ամյակի կապակցությամբ ունեցած իր ելույթում Հյուսիսային Կորեայի առաջնորդ Կիմ Չեն Ընը հայտարարել է, որ Փհենյանի և Մոսկվայի հարաբերություններն էլ ավելի են ամրապնդվում ինքնիշխանության համար նրանց համատեղ պայքարի ֆոնին։ Այս մասին հաղորդում է Yonhap գործակալությունը։
«Այսօր ԿԺԴՀ-ի և Ռուսաստանի միջև բարեկամությունը վերածվել է աննախադեպ դաշինքի, որն էլ ավելի է ամրապնդվում նեոնացիզմի վերածնունդը զսպելու և ինքնիշխանությունը, անվտանգությունն ու միջազգային արդարությունը պաշտպանելու նրանց ընդհանուր պայքարի ֆոնին», - ասել է Կիմ Չեն Ընը։
Նա նշել է, որ «ԿԺԴՀ-ի և Ռուսաստանի համերաշխությունից անսահման ուժ է բխում»։
Կիմ Չեն Ընը նաև նշել է այլ երկրների ինքնիշխանության և իրավունքների նկատմամբ ոտնձգություն կատարող «իմպերիալիստների մշտապես աճող հանցագործությունները»։
Միջոցառման հյուրերի թվում էին Ռուսաստանի Պետդումայի խոսնակ Վյաչեսլավ Վոլոդինը և Ռուսաստանի մշակույթի փոխնախարար Անդրեյ Մալիշևը։
Միջոցառման ժամանակ Վոլոդինն ընթերցել է Ռուսաստանի նախագահ Վլադիմիր Պուտինի շնորհավորական ուղերձը Հյուսիսային Կորեայի առաջնորդին։
