«Հանրապետական իշխանության ժամանակ ՀՀԿ-ի կողմից կազամակերպված՝ 30 դպրոցների տնօրեններ մեր դեմ հայցեր էին ներկայացրել: Պահանջում էին դատական ծախսերի հետ միասին 65 մլն դրամ, այն էլ մի շրջանում, երբ դատարաններն ամբողջությամբ կայացնում էին այն որոշումները, որոնք անհրաժեշտ էին իշխանությանը: Եթե մենք այդ ամենից չվախեցանք, ապա այս 3 պարոնների կողմից ներկայացված հայցադիմումները, որոնք ակնհայտ անհիմն են, և վստահ ենք՝ մերժվելու են դատարանի կողմից, մտահոգվելու որևիցե առիթ չեն տալիս: Հակառակը՝ պահանջելու ենք, և իրենք ստիպված են լինելու վճարել մեր դատական ծախսերը»,- այս մասին Poliitik.am-ի իր դեմ ներկայացված հայցադիմումների մասին ասաց Իրազեկ քաղաքացիների միավորում հասարակական կազմակերպության ծրագրերի համակարգող Դանիել Իոաննիսյանը:
Տեղեկացնենք, որ երեկ նա ֆեյսբուքյան գրառմամբ հայտնել էր, որ իրեն դատի են տվել Արթուր Վանեցյանի 3 ընկերները՝ Վահե Հակոբյանը, Բաբկեն Ղազարյանն ու Արշակ Հակոբյանը:
Անդրադառնալով հայցադիմումներին Իոաննիսյանը հայտնեց, որ Արշակ Հակոբյանի ներկայացրածը նույնն է՝ ինչ Բաբկեն Ղազարյանի դեպքում: Հիշեցենք՝ Ղազարյանը դատի է տվել Դանիել Իոաննիսյանին՝ նրա որոշ հայտարարություններ համարելով իր պատիվն ու արժանապատվությունը արատավորող:
«Մի փոքր անհասկանալի է Վահե Հակոբյանի ներկայացրածը, քանի որ նա երկար ժամանակ փորձում էր մեզ դատի տալ. բայց հայցադիմումի մեջ ինչ-որ տեխնիկակակն սխալի պատճառով դա իրենց մոտ չէր ստացվում: Դեռ հայցադիմումը չեմ տեսել, բուն հայցային պահանջին տեղյակ չեմ: Էլի զրպարտության գործ է, բայց թե կոնկրետ ինչ՝ մանրամասները չգիտեմ»,- նկատեց Դանիել Իոաննիսյանը:
Վերջինս նաև չբացառեց, որ այս գործերը հանրավոր է՝ ուղղորդված լինեն ԱԱԾ պետի կողմից՝ միտում ունենալով ճնշում գործադրել.
«Ինձ մոտ տպավորություն կա, որ այս 3 հայցադիմումները ուղղորդված են Արթուր Վանեցյանի կողմից: Ես երեկ նաև հրապարակեցի, թե այդ երեք պարոնները ինչ հարաբերություններ ունեն Արթուր Վանեցյանի հետ, ինչ են առհասարակ արել նրա հետ, ովքեր են նրանք, ինչ արժանիքներ ունեն և այլն»,- ամփոփեց նա:
