Հայաստանում անհրաժեշտ է ներդնել ֆիզիկական և իրավաբանական անձանց էլեկտրոնային ծանուցման լիարժեք մեխանիզմ։ Այդ մասին Ազգային ժողովի նիստում՝ «Ինտերնետով հրապարակային և անհատական ծանուցման մասին» օրենքում փոփոխություններ և լրացումներ կատարելու մասին օրենքների նախագծերի փաթեթը և հարակից օրենքներում փոփոխություններ քննարկելիս, նոյեմբերի 11-ին հայտարարել է հանրապետության արդարադատության նախարար Սրբուհի Գալյանը։
Ըստ նրա խոսքերի՝ նախագծով առաջարկվում է քաղաքացիներին, ինչպես նաև իրավաբանական անձանց ու անհատ ձեռնարկատերերին պետական մարմինների և տեղական ինքնակառավարման մարմինների կողմից ծանուցումն իրականացնել բացառապես էլեկտրոնային եղանակով։ «Բոլոր փուլերն անցնելու դեպքում ծանուցումը կհամարվի հանձնված»,- հայտնել է Գալյանը։
Ծանուցումները կուղարկվեն ֆիզիկական անձանց պաշտոնական էլեկտրոնային փոստին։ Իսկ իրավաբանական անձանց և անհատ ձեռնարկատերերի համար կընտրվի հարկային հաշվետվությունների կառավարման էլեկտրոնային համակարգի անհատական էջը։
Արդարադատության նախարարության տվյալներով՝ միայն 2024 թվականին թղթային ծանուցումների վրա ծախսվել է ավելի քան 653 միլիոն դրամ։ Այս միջոցները հնարավորություն կտան էապես կրճատել պետբյուջեի ծախսերը և պարզեցնել ֆիզիկական ու իրավաբանական անձանց ծանուցման գործընթացը։
Պետական-իրավական հարցերի մշտական խորհրդարանական հանձնաժողովի ղեկավար, «Քաղաքացիական պայմանագիր» իշխող խմբակցության պատգամավոր Վլադիմիր Վարդանյանն, իր հերթին, հայտարարել է, որ այս օրենսդրական նախաձեռնությունը նախկինում ստացել էր մշտական խորհրդարանական հանձնաժողովի բացասական արձագանքը։ Ընդ որում, նա շտապել է նշել, որ այդ որոշումն ավելի շուտ ձևական բնույթ է կրում։ Բանն այն է, որ իշխող խմբակցության որոշ պատգամավորներ և հանձնաժողովի անդամներ ուղղակի չեն հասցրել ժամանակին ներկայանալ և մասնակցել քվեարկությանը։
