Հեռուստատեսության և ռադիոյի հանձնաժողովը նոյեմբերի 19-ին գումարել է իր հերթական նիստը։ Ինչպես տեղեկացնում է Հանձնաժողովի տարածած հաղորդագրությունից, օրակարգում ընդգրկված էր երեք հարց՝
- Լսողական ծրագրի հաճախականության օգտագործման լիցենզավորման մարզային՝ ՀՀ Տավուշի մարզի տարածքում սփռման մրցույթ հայտարարելու վերաբերյալ
- «ԷՅ ԲԻ ՍԻ ՄԵԴԻԱ» ՍՊ ընկերության հեղինակազորման հայտի վերաբերյալ:
- «ԻՆՏԵՐԼԻՆԿ» ՍՊ ընկերության` Երևան քաղաքի և Կոտայքի մարզի տարածքում ցանցային օպերատորի գործունեության լիցենզիա ստանալու դիմումի վերաբերյալ:
Օրակարգը հաստատելուց հետո, Հեռուստատեսության և ռադիոյի հանձնաժողովը որոշել է 2025 թվականի նոյեմբերի 19-ին հայտարարել լսողական ծրագրի հաճախականության օգտագործման լիցենզավորման մարզային՝ ՀՀ Տավուշի մարզի տարածքում սփռման մրցույթ։
Մրցույթի մասին մանրամասն տեղեկատվությունը հրապարկված է Հայաստանի Հանրապետության հրապարակային ծանուցումների www.azdarar.am և Հեռուստատեսության և ռադիոյի հանձնաժողովի www.tvradio.am պաշտոնական ինտերնետային կայքերում։
Երկրորդ հարցը վերաբերում էր «ԷՅ ԲԻ ՍԻ ՄԵԴԻԱ» ՍՊ ընկերության հեղինակազորման հայտին։ «ԷՅ ԲԻ ՍԻ ՄԵԴԻԱ» ՍՊ ընկերությունը 2025 թվականի նոյեմբերի 10-ին Հեռուստատեսության և ռադիոյի հանձնաժողով (այսուհետ` Հանձնաժողով) է ներկայացրել հեղինակազորման հայտ: Ընկերության կողմից ներկայացված հայտի համաձայն տեսալսողական ծրագրի անվանումն է՝ «ԷՅ ԲԻ ՍԻ ՄԵԴԻԱ» (ABC media): Ուսումնասիրելով ընկերության հայտը Հանձնաժողովը որոշեց բավարարել հայտը և հեղինակազորել ընկերությանը։ Որոշումն ուժի մեջ է մտնում «ԷՅ ԲԻ ՍԻ ՄԵԴԻԱ» ՍՊ ընկերությանը պատշաճ իրազեկելու օրվան հաջորդող օրվանից։
Օրակարգային վերջին հարցը վերաբերում էր «ԻՆՏԵՐԼԻՆԿ» ՍՊ ընկերության լիցենզիա ստանալու դիմումին։ «ԻՆՏԵՐԼԻՆԿ» ՍՊ ընկերությունը 2025 թվականի նոյեմբերի 12-ին Հեռուստատեսության և ռադիոյի հանձնաժողով է ներկայացրել Երևան քաղաքի և Կոտայքի մարզի տարածքում ցանցային օպերատորի գործունեության լիցենզիա ստանալու վերաբերյալ դիմում: Ներկայացված դիմումի համաձայն Ընկերությունը նախատեսում է տեսալսողական ծրագրերի վերահաղորդումն իրականացնել IPTV եղանակով, ինչպես նաև վերահաղորդել 70 տեսալսողական ծրագիր։ Ուսումնասիրելով հայտը Հանձնաժողովը որոշեց բավարարել Ընկերության դիմումը։ Որոշումն ուժի մեջ է մտնում «ԻՆՏԵՐԼԻՆԿ» ՍՊ ընկերությանը պատշաճ իրազեկելու օրվան հաջորդող օրվանից։
