Հարավային Կորեայի նախագահ Լի Չժե Մյոնը Ճապոնիայի վարչապետ Սանաե Տակաիչի հետ հանդիպմանն ասել է, որ Սեուլը հանդես է գալիս հօգուտ երկու Կորեաների խաղաղ գոյակցության՝ առանց մարտնչելու անհրաժեշտության: Այս մասին ասվում է կողմերի բանակցությունների արդյունքների շուրջ համատեղ հայտարարության հարավկորեական մասում, որը հրապարակվել է Լի Չժե Մյոնի գրասենյակի կողմից։
Նախագահի խոսքով՝ բանակցությունների ընթացքում Ճապոնիայի և Հարավային Կորեայի ղեկավարները խորացված քննարկումներ են անցկացրել Կորեական թերակղզում տիրող իրադրության շուրջ։
«Ես ներկայացրել եմ մեր կառավարության տեսլականը խաղաղ Կորեական թերակղզի ստեղծելու վերաբերյալ, որտեղ երկու Կորեաները կարող են խաղաղ գոյակցել և համատեղ զարգանալ, որտեղ չկա մարտնչելու անհրաժեշտություն», - հայտարարել է նախագահը։
Լի Չժե Մյոնը նաև ընդգծել է Հյուսիսարևելյան Ասիայի երկրների միջև համագործակցության և փոխադարձ հարգանքի կարևորությունը։
Նրա հայտարարությունը հրապարակվել է Տակաիչիի հետ բանակցություններից հետո, որոնք ընդլայնված կազմով տեղի են ունեցել Հարավային Կորեայի նախագահի հայրենի Անդոն քաղաքում։ Հունվարին Լի Չժե Մյոնն այցելել էր Տակաիչիի հայրենի տարածաշրջան՝ Ճապոնիայի Նարա պրեֆեկտուրա։
