Օրերս հայտնի դարձավ, որ մոտ կես միլիարդ դրամի հափշտակություն կազմակերպելու համար մեղադրվող ՀՀ երրորդ նախագահ Սերժ Սարգսյանն ու գյուղատնտեսության նախկին նախարար Սերգո Կարապետյանը Հատուկ քննչական ծառայությունում առերեսվել են:
Հիշեցնենք, որ դեկտեմբերի 4-ին ՀՔԾ-ն հայտարարեց, որ իրենց վարույթում քննվող դիզվառելիքի վերաբերյալ քրեական գործի նախաքննության ընթացքում ձեռք բերված բավարար ապացույցների համակցության հիման վրա Սերժ Սարգսյանին մեղադրանք է առաջադրվել վատնման եղանակով առանձնապես խոշոր չափի՝ մոտ կես միլիարդ ՀՀ դրամի հափշտակություն կազմակերպելու համար: Նրա նկատմամբ որպես խափանման միջոց է ընտրվել չհեռանալու մասին ստորագրությունը:
Մեր աղբյուրների տեղեկացմամբ առերեսման ժամանակ նախկին նախարար Սերգո Կարապետյանը հայտարարել է, որ «հավատացյալ մարդ է ու ասելու է ճշմարտությունը, որպեսզի Աստված իրեն չպատժի»։ Նախագահ Սերժ Սարգսյանը սրան ի պատասխան հեգնել է, որ «եթե հավատացյալ էիր, ապա ինչու ես անօրինական հրահանգ կատարել»։
Առերես հարցաքննության ամբողջ ընթացքում Սերգո Կարապետյանը գտնվել է հոգեպես ճնշված վիճակում։ Ակնհայտ է եղել, որ Կարապետյանը ստիպված է գնում այս քայլին։
