Սոցցանցում տեսա, որ մեծ քննարկում էր առաջացրել Ադրբեջանի մի նեկայացուցչի այն հայտարարությունը, որ «Թրամփի ուղին» պետք է գործի Ադրբեջանի համար ընդունելի պայմաններով, և դրա շուրջ կար շատ մեծ և ծավալուն քննարկում՝ ամենատարբեր մեկնաբանություններով: Բայց մենք չենք ասում, որ Ադրբեջանի համար անընդունելի պայմաններով պիտի գործի: Մենք թուղթ ենq ստորագրել ընդունելի պայմանների մասին: Այդ մասին Ազգային ժողով-Կառավարություն հարցուպատասխանի ժամանակ ասաց վարչապետ Նիկոլ Փաշինյանը՝ անդրադառնալով Ադրբեջանի ԱԳ նախարար Ջեյհուն Բայրամովի վերջին հարցազրույցի շրջանակում ՀՀ-ին և Նիկոլ Փաշինյանին առնչվող հայտարարություններին:
Վարչապետը ևս մեկ անգամ հիշեցրեց՝ Ադրբեջանը ստորագրել է այն թղթի տակ, թե որոնք են երկուստեք ընդունելի պայմանները՝ տարածքային ամբողջականություն, ինքնիշխանություն, իրավազորություն, փոխադարձություն, սահմանների անխախտելիություն:
Անդրադառնալով թեմայի շրջանակում ներքաղաքական հայտարարություններին՝ Փաշինյանը նշեց. «Սերժ Սարգսյանը և Ռոբերտ Քոչարյանը ինչ-որ կոնսպիրացիաների, բաների մասին են խոսում: Լսե՛ք, եկեք ասե՛ք, եկե՛ք դիմա՛ցս կանգնեք, ասե՛ք տեսեք՝ ինչ կլինի: Այսինքն՝ այս կոնսպիրացիայի մասին խոսել, թողնել փախչե՞լ, թողնել գնա՞լ… Բանավեճից հրաժարվել են, քիչ է, հիմա էլ հերթով հրաժարվում են: Հեսա մինչև ավագանի, տարածքային կազմակերպություն, բարեկամ, բաջանաղ, քեռի, ով տեսնի, ճանապարհը փոխելու է՝ բանավեճի մեջ չմտնի»:
Ինչ վերաբերում է «Թրամփի ուղուն», ապա Փաշինյանը նշեց, որ մինչև տարվա վերջ թղթի վրա պետք է նկարագրվեն բոլոր մանրամասները:
«2026 թվականի առաջին կեսին պետք է համաձայնեցնենք, երկրորդ կեսին պետք է սկսենք շինարարական աշխատանքները. սա է պլանը»,- ասաց նա՝ միաժամանակ նշելով, որ իր փորձը ցույց է տալիս, որ նման ծրագրերը սովորաբար ժամկետից շեղվում են, դրա համար ցանկություն չունի բարձրաձայնել դրանց մասին:
«Քաղաքացիական պայմանագիր» խմբակցության պատգամավոր Դավիթ Դանիելյանը նկատեց՝ հանրության հետաքրքրությունը մեծ է ճանապարհի մասով, քանի որ դրա գործարկումից հետո ակնկալվում է, որ Սյունիքի մարզում տնտեսական միջավայրն ամբողջությամբ փոխվելու է: Ըստ այդմ՝ Փաշինյանը որոշ մանրամասներ ներկայացրեց:
«Ես կարող եմ հստակ ասել, թե երկաթուղին որտեղով է անցնելու: Երկաթուղին անցնելու է խորհրդային ժամանակ գոյություն ունեցած երկաթուղու երթուղով, որովհետև ուրիշ տեղով երկաթուղի կառուցելը իրատեսական չէ: Կարող եմ ասել, որ գազամուղը անցնելու է դրանից էականորեն հյուսիս, էլեկտրական գծերն անցնելու են էականորեն հյուսիս, ընդ որում՝ չեմ կարող ասել նույնիսկ, թե որոնք Սյունիքի մարզում կմնան, որոնք` Վայոց ձորի մարզի հատվածում, որովհետև դա բազմաթիվ գործոններից է կախված: Այսինքն՝ քարտեզի վրա ամեն ինչ հարթ է, թվում է՝ որտեղ ուզենաս, գիծը կքաշես, այնուամենայնիվ, տեղանքը, բնությունն ուրիշ բան են:
Ավտոճանապարհների հետ կապված՝ գիտեք, որ Հյուսիս-հարավը կառուցվում է, և մենք Արևելք-արևմուտք ուղղությամբ ճանապարհները կինտեգրենք Հյուսիս-հարավ ճանապարհներին և այլն»,- ասաց նա և հավելեց՝ կարող է հստակ մի բան ասել՝ նախագիծն իրականացվելու է և շատ արագ, շատ մեծ տեմպերով և այն պայմաններով, ինչ պայմաններով Վաշինգտոնի հռչակագրում գրված է:
