Տեղի է ունեցել ԳԴՀ-ում ՀՀ դեսպան Վիկտոր Ենգիբարյանի հանդիպումը Բունդեսթագի Գերմանիա-Հարավային Կովկաս խորհրդարանական խմբի ղեկավար Միրզե Էդիսի (Mirze Edis, Ձախեր/Die Linke) հետ: ՀՀ դեսպանը շնորհավորել է Էդիսին խմբի ղեկավար ընտրվելու կապակցությամբ և մաղթել հաջողություն: Այս մասին տեղեկացնում են Գերմանիայում ՀՀ դեսպանությունից:
Վիկտոր Ենգիբարյանը և Միրզե Էդիսը կարևորել են խորհրդարանական դիվանագիտության դերը Հայաստան-Գերմանիա գործընկերության համատեքստում և մտքեր փոխանակեցին երկկողմ օրակարգի, Հայաստան-ԵՄ ինտեգրացիոն գործընթացի, ինչպես նաև Հայաստան-Թուրքիա, Հայաստան-Ադրբեջան հարաբերությունների բարելավման թեմաներով:
ՀՀ դեսպանը ներկայացրել է տարածաշրջանում խաղաղության հաստատումից հետո տնտեսական հնարավորությունները և Հայաստանի կառավարության Խաղաղության խաչմերուկ նախագիծը։ Վերջում ՀՀ դեսպանը խմբի նորընտիր ղեկավարին հրավիրել է այցելել Հայաստան։
