Գնահատման և թեստավորման կենտրոնի փոխտնօրեն Կարո Նասիբյանն այսօր՝ օգոստոսի 1–ին ամփոփել է Հայաստանում ընդունելության քննությունների արդյունքները։
«Մենք ունենք երկու մրցույթ, մեկը անվանում ենք հիմնական մրցույթ, և երկրորդը լրացուցիչ թափուր տեղերի մրցույթ։ Հիմնական մրցույթից դրական միավորներով դուրս մնացած դիմորդները իրավունք ունեն լրացուցիչ փուլի մրցույթին մասնակցել, հայտագրելով մինչև վեց բուհ և մասնագիտություն։ Մենք ավարտել ենք նաև լրացուցիչ փուլի մրցույթի կազմակերպումը և ունենք արդեն ընդհանուր պատկերը։
Սկսենք քննություններից, հունվարի 15-ից մինչև հուլիսի 10-ը ԳԹԿ–ն կազմակերպել է միասնական քննություններ, որոնց մասնակցել է 41500-ից ավելի դիմորդ։
Այս տարի պետական և ոչ պետական բուհերին հատկացված էր 2142 անվճար տեղ և 9984 վճարովի տեղ։ Երկրորդ և երրորդ փուլերում հայտագրվել են 16011 դիմորդներ։
Երկու դրական գնահատականներով չեն ընդունվել 1999 հոգի, այսինքն նրանք այն դիմորդներ են, որոնք կարող էին մասնակցել լրացուցիչ փուլի մրցույթներին։ Անբավարար գնահատական ստացածների թիվը երկու քննություններից 1227 է և մեկ քննությունից 1797։
Ներբուհական քննություններում, որոնք կազմակերպվում են արվեստի, մշակույթի, ֆիզիկական կուլտուրայի, սպորտի մասնագիտությունների բուհերում, դիմորդների թիվը եղել է 2069, որից 753 դիմորդ չի ընդունվել։
Բուհ են ընդունվել միասնական քննությունների արդյունքով 7719 դիմորդ, խոսքը հիմնական փուլի մասին է։ Եվ ներբուհական քննություններով 2069, այսինքն 9788 հոգի։ Երբ հիմնական փուլի մրցույթի արդյունքները արդեն հայտնի էին, ունեինք թափուր տեղեր 2355, անվճար տեղ 264 և վճարովի՝ 2091։
Մրցույթի լրացուցիչ փուլում հայտագրվել է 1478 դիմորդ։ Այսինքն մոտ 500 դիմորդ չեն հայտագրվել։ Դրանք այն երևի թե այն դիմորդներն են, որոնք իրենց գնահատականները կարող են պահել հեռակա ուսման մրցույթի մասնակցելու համար, կամ այն դիմորդներն են, որոնք մի մասը արդեն հատկապես տղաները զորակոչվել են բանակ։
Բուհ է ընդունվել 1182 հոգի, այդ թվում ներբուհական քննություններով՝ 24 հոգի։ Անվճար ընդունվել է 47 հոգի, վճարով է ընդունվել 1135 հոգի։ Երկու փուլերի մրցույթների արդյունքում դուրս են մնացել ընդհանուր առմամբ 296 դիմորդ, որոնք ունեցել են դրական գնահատականներ, սակայն որևէ բուհ չեն ընդունվել։
Լրացուցիչ փուլի, այսինքն երկրորդ մրցույթը կազմակերպելուց հետո թափուր են մնացել ընդհանուր առմամբ 1174 տեղ, անվճար 219 և վճարովի 955 տեղ»,– ընդգծեց Նասիբյանը։
