Հայաստանի 2026 թվականի պետական բյուջեի նախագիծը, որը ներկայացրել է գործող Կառավարությունը, ոչ մի կապ չունի նույն Կառավարության նախընտրական ծրագրի հետ։ Այս մասին նոյեմբերի 13-ին Ազգային ժողովի նիստում՝ 2026 թվականի պետական բյուջեի նախագծի քննարկման ժամանակ, հայտարարել է ընդդիմադիր «Հայաստան» խմբակցության պատգամավոր Արթուր Խաչատրյանը։
Պատգամավորն անդրադարձել է բազմաթիվ թեմաների ու խնդիրների, սակայն նրա ուշադրությունը հիմնականում կենտրոնացած է եղել տնտեսական ցուցանիշների վրա։ «Կառավարության և քաղաքական մեծամասնության ներկայացուցիչներն այստեղ մեզ համոզում էին, որ պարտքի մեջ վատ բան չկա։ Ըստ նրանց՝ այն նպաստում է տնտեսության բարձր աճին, բնակչության գնողունակության բարձրացմանը և այլն։ Ես փորձեցի հասկանալ, թե ինչպիսի՞ն կլինի մեր իրական տնտեսական աճը՝ առանց պարտքի։ Այդ հարցի պատասխանը ոչ ոք չունի», — ասել է Խաչատրյանը։
Նա որոշել է զուգահեռներ անցկացնել ընտանիքի հետ, որպեսզի քաղաքացիներին ավելի հեշտ լինի հասկանալ, թե իրականում ինչպես է ամեն ինչ աշխատում և որքանո՛վ է վատ ներկայիս տնտեսական իրավիճակը։ «Հաջորդ ֆինանսական տարում Պետական պարտքի մարման համար Կառավարությունը կծախսի 1 տրլն. 53 մլրդ. դրամ։ Ահա այսքան գումար, թանկագի՛ն քաղաքացիներ, դուրս կգա մեր՝ ձեր և իմ ընտանեկան բյուջեից։ Միայն պետական պարտքի տոկոսները կկազմեն 432 մլրդ. դրամ», - պարզաբանել է ընդդիմադիր պատգամավորը։
Համեմատության համար նա հրապարակել է 2026 թվականին մի շարք ոլորտների համար նախատեսված ծախսերը։ Օրինակ՝ առողջապահության համար ՀՀ պետական բյուջեից կհատկացվի 212 միլիարդ դրամ, կրթության համար՝ 361 միլիարդ դրամ, իսկ սոցիալական կարիքների համար (բացառությամբ կենսաթոշակների)՝ 315 միլիարդ դրամ։
