Երևանում անցկացվում է «Արցախ. չլուծված հակամարտություն, վերադարձի իրավունք» խորագրով միջազգային համաժողով, որը կազմակերպվել է Հայ հեղափոխական դաշնակցության ջանքերով։
Միջոցառման ընթացքում կքննարկվեն հակամարտությունները ուժով և դրա կիրառման սպառնալիքներով լուծելու անթույլատրելիությունը, չլուծված արցախյան խնդիրը, արցախահայերի հայրենիք վերադառնալու իրավունքի իրականացման անհրաժեշտությունը, ինչպես նաև տարածաշրջանում արդար և կայուն խաղաղություն հաստատելու հեռանկարները։
Միջոցառման ընթացքում կքննարկվեն հետևյալ հիմնական հարցերը.
- Ղարաբաղյան հակամարտության ներկայիս փուլը և ընթացող գործընթացների վտանգավոր միտումները,
- Միջազգային հանրության պատասխանատվությունը և արդար ու կայուն խաղաղության անհրաժեշտությունը,
- Ժամանակակից մարտահրավերները հաղթահարելու համար անցյալի փորձի կիրառումը,
- Արցախահայության շահերի պաշտպանությունը և վերադարձի իրավունքի իրացումը որպես կայուն խաղաղության նախապայման,
- Մշակութային ժառանգության պահպանման արդիականությունը Ադրբեջանի կողմից իրականացվող ոչնչացման և յուրացման քաղաքականության համատեքստում,
- Գերիների վերադարձի և հումանիտար հարցերի անհետաձգելի լուծումը ՝ որպես փոխվստահության մթնոլորտի ստեղծման հիմք։
Զեկույցներով հանդես կգան Կիպրոսի, Ֆրանսիայի, Գերմանիայի, Ռուսաստանի Դաշնության, Իրանի, Արցախի և Հայաստանի Հանրապետության քաղաքական, գիտական և փորձագիտական շրջանակների ներկայացուցիչներ։
Համաժողովի նպատակն է ստեղծել միջազգային և ազգային կոալիցիա՝ արցախյան խնդրի արդարացի լուծման, արցախահայերի հայրենիք վերադառնալու իրավունքի իրականացման և տարածաշրջանում երկարատև ու կայուն խաղաղության հաստատման համար։
