Այդ որակումների առնչությամբ իրավական գործընթաց ենք սկսելու, որովհետև մարդիկ պետք է պատասխան տան այն բանի համար, ինչ ասում են, և պետք է պատասխան տան այն բոլոր անհեթեթ, իրականությանը չհամապատասխանող, մարդու արժանապատվությունն ու պատիվը ոտնահարող, թիրախավորող և շարունակաբար սա նպատակաուղղված իրականացնող գործունեության համար: Առաջիկայում կլինեն համապատասխան հայցեր: Այդ մասին Ազգային ժողով-Կառավարություն հարցուպատասխանի ժամանակ հայտարարեց ԿԳՄՍ նախարար Ժաննա Անդրեասյանը՝ արձագանքելով «Քաղաքացիական պայմանագիր» խմբակցության պատգամավոր Էդուարդ Աղաջանյանի այն դիտարկմանը, թե Ծիծեռնակաբերդի հուշահամալիրի վերանորոգումը մշակութային հուշարձանների նպատակային ոչնչացում է որակվում:Նախարարը նախ ներկայացրեց, թե ինչ է տեղի ունեցել վերջին տասնամյակների ընթացքում: Ըստ այդմ՝ վերջին 60 տարիներին չի եղել վերանորոգման գործընթաց, եղել են լրջագույն խնդիրներ՝ ջրահեռացման հետ կապված, որոնք, ըստ Անդրեասյանի, եթե ժամանակին լուծված լինեին, այսօր այդ խնդիրները չէին լինի: Ըստ նախարարի՝ 2015-ին իրականացվել են նաև հապճեպ աշխատանքներ՝ առանց հաշվի առնելու շատ խնդիրներ:«Այսօր ունենք խնդիր, որ թանգարանի 10 տարեկան շենքում հարցեր կան, երբ դրանք պիտի ուղղակի չլինեին, որովհետև 10 տարին շենքի համար այն ժամանակը չէ, որ այդ հարցերն առաջանան: Սա նշանակում է, որ լրջագույն խնդիրներ կան, որոնք տարիներով կուտակվել են:Այսօր այն, ինչ փորձում ենք անել, փորձում ենք մեր կարևորագույն հուշարձանը բերել պատշաճ տեսքի, որովհետև այդտեղ ամեն ապրիլի 24-ին բազմահազար մարդիկ են այցելում: Ո՞վ էր պատասխան տալու, եթե այդ մույթերից որևէ սալ պոկվեր: Արդյոք չպիտի՞ պետությունը ժամանակին և պատշաճ արձագանքեր դրան: Հիմա ինչպե՞ս է դա արվում: Արվում է այնպես, ինչպես կարգն է, օրենսդրությամբ նախատեսված բոլոր ընթացակարգերով»,- ասաց նախարարը՝ նշելով, որ ճարտարապետները ևս վերահաստատել են լուծումները:«Սա իմ անձնական հսկողության տակ է: Ես ամեն շաբաթ եմ այցելում, որպեսզի տեսնեմ՝ ինչպես են աշխատանքներն ընթանում:Վստահեցնում եմ՝ հուշահամալիրը բաց է, թանգարանը բաց է, յուրաքանչյուր քաղաքացի կարող է ցանկացած պահի այցելել»,- ասաց նա:
