Մենք չենք բացառում Ազգային անվտանգության ծառայության տնօրենին, գլխավոր դատախազին, ինչպես նաեւ արտաքին գործերի նախարարության եւ հանրապետության պաշտպանության նախարարության ներկայացուցիչներին ԱԺ կանչելը՝ պարզաբանում ստանալու համար: Այս մասին սեպտեմբերի 13-ին խորհրդարանի նիստին հայտարարեց Ազգային ժողովի նախագահ Ալեն Սիմոնյանը՝ պատասխանելով ընդդիմադիր «Հայաստան» խորհրդարանական խմբակցության քարտուղար Արծվիկ Մինասյանի համապատասխան առաջարկին:
Ընդդիմադիր պատգամավորի խոսքով՝ ադրբեջանական կողմը հանցագործություն է կատարել, սակայն հայկական կողմից ոչ մի քայլ չի ձեռնարկվել: «Ստացվում է այնպես, որ օտարերկրյա պետության ներկայացուցիչները խոչընդոտում են մեր քաղաքացիների տեղաշարժը: Ավելին, նրանք միջոցների անօրինական պահումներ են իրականացնում` տուրքերի տեսքով, պայմաններ են դնում մեր քաղաքացիների առջեւ: Ի դեպ, խոսքը զինված խմբերի մասին է»,- հայտարարեց Մինասյանը:
Խորհրդարանի նախագահ Ալեն Սիմոնյանը չբացառեց, որ նման հանդիպում կարող է կազմակերպվել: Մինասյանը, մասնավորապես, պետք է գրավոր հարցում ներկայացնի, որից հետո կսկսվի առաջիկա հանդիպման հնարավոր ձեւաչափի եւ մնացած ամեն ինչի քննարկումը:
