Առաջիկա օրերին Աբխազիայի խորհրդարանը պետք է նշանակի արտահերթ նախագահական ընտրությունների օրը։ Ըստ Աբխազիայի ընտրական օրենսդրության՝ հաջորդ նախագահական ընտրությունները խորհրդարանը նշանակում է ոչ ուշ, քան չորս ամիս անց և անցկացվում են նախագահական ժամկետի ավարտից ոչ շուտ, քան երեք և ոչ ուշ, քան մեկ ամիս առաջ, հաղորդում է Apsnypress-ը։
Եթե նախագահը դադարեցնում է իր լիազորությունների իրականացումը մինչև սահմանադրական ժամկետի ավարտը, խորհրդարանը արտահերթ ընտրություններ է նշանակում նախագահի լիազորությունների դադարեցման օրվանից ոչ ուշ, քան 15 օր անց։ Արտահերթ ընտրությունները պետք է անցկացվեն նախագահության վաղաժամկետ դադարեցման օրվանից երեք ամսվա ընթացքում։
Աբխազիայի ղեկավար Ասլան Բժանիան հրաժարական է տվել 2024 թվականի նոյեմբերի 19-ին։ Այսպիսով, արտահերթ նախագահական ընտրությունները պետք է նշանակվեն մինչև 2025 թվականի փետրվարի 19-ը։ Ըստ Աբխազիայի Սահմանադրության և «Աբխազիայի Հանրապետության Նախագահի ընտրության մասին» սահմանադրական օրենքի՝ Աբխազիայի Հանրապետության քաղաքացին, ազգությամբ աբխազ, որը վարժ տիրապետում է պետական լեզվին, 35 տարեկանից ցածր չէ և 65 տարեկանից բարձր չէ, ունի ընտրելու իրավունք և առնվազն 5 տարի մշտապես բնակվել է Աբխազիայի տարածքում, կարող է ընտրությունների օրը նախագահ ընտրվել։ Աբխազիայի նախագահն ընտրվում է 5 տարի ժամկետով։ Նույն անձը կարող է լինել Աբխազիայի ղեկավար ոչ ավելի, քան երկու ժամկետ անընդմեջ։ Նախագահի հետ միաժամանակ փոխնախագահ է ընտրվում:
