Ես տուժել եմ օնլայն վարկ վերցնելու համար: 0,3 տոկոսով վարկ էին առաջարկում: Մուծումներ պետք է անեի, որ ինձ վարկ տրամադրեին: Սկզբից 150 դոլար մուծում ասեցին, հետո՝ 800 դոլար, հետո՝ 1,000, 1,200: Մի խոսքով՝ 5,000 դոլար մուծումներ արեցի: Բայց այդ վարկը ոչ տրամադրվեց, ոչ էլ տեղ հասավ: Այս մասին, այսօր՝ նոյեմբերի 19-ին, Գլխավոր դատախազության դիմաց «Հանրային վերահսկողություն» ՀԿ-ի կազմակերպած բողոքի ակցիայի ժամանակ ասաց զեղծարարության զոհ դարձած Ազնիվ Գրիգորյանը:
Հարցին՝ խորհրդակցել է որևէ մեկի հետ և ճշտել, արդյոք աշխարհում նման տոկոսադրույքով վարկ տրամադրում են՝ տուժողը պատասխանեց՝ «Չէ, չեմ խորհրդակցել՝ հավատալով խաբնվել ենք, վարկերը մուծել ենք, որի արդյունքում ոչ մի վարկ էլ չեն տրամադրել: Խաբեցին ու կորան, ֆեյսբուքից էլ ջնջեցին»:
Ազնիվ Գրիգորյանը նաև հայտնեց, որ իրենից պահանջել են նաև տան փաստաթղթերը նկարել ուղարկել:
Հարցին ինչո՞ւ երբեք չի կասկածել, որ կարող է զեղծարարի հետ գործ ունենա, քանի որ տարբեր հարթակներով միշտ զգուշացումներ են եղել զեղծարարների հետ կապված, Ազնիվ Գրիգորյանը պատասխանեց «Վստահելի ձևով էին անում առաջարկները: Մուծումներից հետո հետ էին ուղարկում թղթեր, որ ստորագրեինք, որ դրանք, իբր պետական մուծումներ են, պիտի արվի՝ ձեզ ապահովագրելու համար»:
Զեղծարարության զոհ դարձած կինը նշեց, որ ստորագրած թղթերը կարդացել է, բայց բաներ կային, որ չի հասկացել: Նրա վստահությունը փարատել է իրեն ծանոթ Վանաձորից քաղաքից մի կին, որը վստահեցրել է, որ ինքը 20 հազար դոլար ստացել է և տուն գնել:
Տուժողի խոսքով՝ իրենք դիմել են ոստիկանություն, ԱԱԾ. «Մեկ տարի տանել բերելով ԱԱԾ մեզ ասեց, գնացեք ու դիմեք ձեր տարածքի ոստիկանություն: Դիմել ենք, հարուցվել է քրեական գործ: Մեզ ասում են՝ չենք կարողանում գտնել, չենք կարողանում բռնել: Այդ աղջկան են ճարել, բերել Վանաձորից, ով որ մեզ համոզել էր, որ հաստատ է այդ վարկը: Բերեցին երես-երես, ասում է՝ չէ, ես չեմ ասել»:
Ազնիվ Գրիգորյանի խոսքով՝ կազմակերպությանը դիմել էր՝ 8 մլն դրամ վարկ ստանալու համար, որի դիմաց կորցրել է 2,5 միլիոն դրամ:
