Վրաստանի նախագահ Սալոմե Զուրաբիշվիլին կանխատեսել է, որ հոկտեմբերի 26-ին կայանալիք խորհրդարանական ընտրություններում «Վրացական երազանք» կուսակցության հաղթանակի դեպքում, իրեն կարող են իմփիչմենթ հայտարարել և բանտ նստեցնել: Նրա խոսքերը մեջբերում է Mtavari հեռուստաալիքը:
«Միգուցե, ինձ իմփիչմենթի ենթարկեն և բանտ նստեցնեն, եթե դա տեղի ունենա», - պատասխանել է նախագահն այն հարցին, թե ինչ տեղի կունենա ընտրություններում իշխող կուսակցության հաղթանակից հետո:
Հոկտեմբերի 26-ին կայանալիք ընտրություններում Վրաստանի նախագահն աջակցում է ընդդիմությանը:
Ավելի վաղ խորհրդարանի խոսնակ Շալվա Պապուաշվիլին հայտարարել էր, որ «Վրացական երազանք»-ը կվերսկսի նախագահ Սալոմե Զուրաբիշվիլիի դեմ իմփիչմենթի գործընթացը. պատճառը նրա արտասահմանյան այցերն են, որոնք համաձայնեցված չեն եղել կառավարության հետ:
Վրաստանի սահմանադրության համաձայն՝ նախագահը միջազգային հարաբերություններում ներկայացուցչական լիազորություններն իրականացնում է կառավարության համաձայնությամբ: Սահմանադրության խախտումը կարող է հիմք դառնալ իմփիչմենթի համար։
Նախագահին իմփիչմենթ հայտարարելու համար անհրաժեշտ է խորհրդարանի 100 պատգամավորի ձայնը, սակայն իշխող կուսակցությունն ունի 84 ձայն։
