Վրաստանի խորհրդարանի նախագահը մեկնաբանել է «Վրացական երազանքի» բարձրաստիճան պաշտոնյաների նկատմամբ ԱՄՆ-ի սահմանած վիզային սահմանափակումները, հայտնում է SOVA-ն։
Շալվա Պապուաշվիլին նախագահ Ջո Բայդենի վարչակազմին մեղադրում է Վրաստանի հետ հարաբերությունների վատթարացման մեջ։
«Այս վարչակազմը պարտվեց ընտրություններում, նրա մանդատը սպառվում է, բայց, այնուամենայնիվ, ամերիկյան ժողովրդի անունից նրանք ոչնչացնում են հարաբերություններն այնպիսի կարևոր գործընկերոջ հետ, ինչպիսին Վրաստանն է, և դա, իհարկե, շատ մտահոգիչ է»:
Ավելին, Պապուաշվիլին հայտարարել է, որ ԱՄՆ-ում ժողովրդավարությունն ավելի լավը չէ։ Եվ նա հիշել է Սահակաշվիլիի ժամանակները, երբ, չնայած «անկախ լրատվամիջոցների վիրտուալ ոչնչացմանը և պետական համակարգի մակարդակով բիզնեսի ռեկետին», Վաշինգտոնը որևէ պատժամիջոց չկիրառեց։
«Այս գործոնների պատճառով ամերիկյան հեռացող վարչակազմի դիրքորոշումն անհասկանալի է և անիմաստ»,- ասել է Պապուաշվիլին։
Հիշեցնենք, որ ԱՄՆ Պետդեպարտամենտը հայտարարել էր վիզային սահմանափակման քաղաքականության շրջանակներում լրացուցիչ միջոցների ներդրման մասին, որոնք արգելում են վիզաներ տրամադրել Վրաստանում ժողովրդավարությունը խարխլելու համար պատասխանատուներին։
Այս միջոցները կանդրադառնան մոտավորապես քսան մարդու, այդ թվում՝ Վրաստանի կառավարության նախարարների, խորհրդարանի անդամների, իրավապահ և անվտանգության մարմինների, ինչպես նաև մասնավոր անձանց:
