Վրաստանի իշխող «Վրացական երազանք» կուսակցությունը հաստատել է, որ Իրակլի Կոբախիձեն դիտարկվում է որպես վարչապետի թեկնածու։ Այս մասին հայտնում է Новости Грузия-ն։
Վարչապետի թեկնածությունն առաջադրելու իրավունք ունի ընտրություններում լավագույն արդյունքներ ցույց տվող կուսակցությունը։ «Վրացական երազանք»-ը վերջերս փոփոխություն է ընդունել, ըստ որի՝ կառավարության ղեկավարի թեկնածությունն առաջադրում է Պատվավոր նախագահ Բիձինա Իվանիշվիլին և հաստատում Քաղաքական խորհուրդը։ Պաշտոնապես այս ամենը տեղի կունենա փետրվարի 1-ին կայանալիք կուսակցության համագումարում։
Դրանից հետո հարցը գնում է խորհրդարան։
Վստահություն ձեռք բերելու համար նախարարների նոր կաբինետին անհրաժեշտ է պարզ մեծամասնության՝ 76 ձայնի աջակցությունը։
Վրաստանի Սահմանադրության համաձայն՝ վարչապետի հրաժարականի պատճառով այսօրվանից բոլոր նախարարները դառնում են ժամանակավոր պաշտոնակատար։ Խորհրդարանը երկու շաբաթ ժամանակ ունի նոր վարչապետին և նրա ներկայացրած թիմին վստահություն հայտնելու համար։
