ԱՄՆ նախագահ Դոնալդ Թրամփի կոչերը Վլադիմիր Զելենսկուն՝ գնալ գործարքի, հաստատում են, որ հենց ուկրաինական կողմն է հակամարտության կարգավորման գործընթացի հիմնական արգելքը, հայտարարել է ՌԴ նախագահի մամուլի քարտուղար Դմիտրի Պեսկովը, հայտնում է ՌԻԱ Նովոստի-ն:
Լրագրողները Պեսկովին հարց են ուղղել այն մասին, թե արդյոք Կրեմլում տեսել են Financial Times թերթի հրապարակումներն առ այն, թե Ուկրաինայի հարցով խաղաղ գործընթացը իբր սառեցվել է այն պատճառով, որ Թրամփը կորցրել է հետաքրքրությունը դրա նկատմամբ:
«Դատելով հայտարարություններից՝ նախագահ Թրամփը ոչ մի հետաքրքրություն չի կորցրել։ Ավելին, նա համառորեն խորհուրդ է տալիս նախագահ Զելենսկուն գնալ գործարքի։ Եվ այդ հայտարարություններից հետևում է, որ հենց ուկրաինական կողմն է բանակցային գործընթացի հիմնական արգելքը»,- լրագրողներին ասել է Պեսկովը:
Ավելի վաղ ԱՄՆ նախագահը հայտարարել էր, որ զարմացած է ուկրաինական կարգավորման համար գործարք կնքելու հարցում կիևյան վարչակարգի ղեկավարի դժկամությունից։ Ինչպես ընդգծել է ամերիկյան առաջնորդը, Զելենսկու հետ շատ ավելի դժվար է գործարք կնքել, քան Ռուսաստանի նախագահ Վլադիմիր Պուտինի հետ:
