Այս շաբաթ Թրամփը պաշտոնական այցով մեկնում է Պեկին՝ Սի Ցզինպինի հետ հանդիպելու համար․ մի այց, որը, վերլուծաբանների կարծիքով, տեղի է ունենում լարված մթնոլորտում՝ ի տարբերություն 2017 թվականի ավելի ջերմ ու արարողակարգային հանդիպման։ Գրում է ParsToday-ը:
Պեկին ժամանելուն պես Թրամփը կմասնակցի պաշտոնական ընդունելության արարողությանը, կանցկացնի փակ բանակցություններ Չինաստանի նախագահի հետ, կայցելի Երկնքի տաճար և պետական ընթրիք կունենա։ Սակայն Իրանի և առևտրային հարցերի շուրջ երկու երկրների միջև առկա տարաձայնությունները ստվեր են գցում հանդիպման վրա։
Իրանը կլինի բանակցությունների հիմնական թեմաներից մեկը, քանի որ Չինաստանը հանդիսանում է իրանական նավթի խոշորագույն գնորդներից մեկը, իսկ Վաշինգտոնը ակնկալում էր, որ Պեկինը ավելի մեծ ճնշում կգործադրի Հորմուզի նեղուցի վերաբացման ուղղությամբ՝ վերջինիս ժամանակավոր արգելափակման հետո հակամարտության ընթացքում, մինչդեռ Չինաստանը հիմնականում կենտրոնացել է հրադադարի միջնորդության վրա։
Միաժամանակ շարունակվում են նաև առևտրային վեճերը․ ԱՄՆ-ի նախկին մաքսատուրքերը չինական ապրանքների վրա և Պեկինի պատասխան քայլերը, այդ թվում՝ ամերիկյան սոյայի գնումների կրճատումը և հազվագյուտ հողային մետաղների արտահանման սահմանափակումները, բարդացրել են երկու երկրների տնտեսական հարաբերությունները։
Չնայած կողմերը անցյալ տարի ինչ-որ կերպ հասան առևտրային հրադադարի, փորձագետները չեն ակնկալում զգալի առաջընթաց այս այցի ընթացքում և կարծում են, որ Չինաստանը, հաշվի առնելով ԱՄՆ-ում մոտեցող միջանկյալ ընտրությունները, կարող է հետաձգել կարևոր զիջումների տրամադրումը։
