Սպիտակ տունը դրական է գնահատել Պեկինում Միացյալ Նահանգների նախագահ Դոնալդ Թրամփի և Չինաստանի նախագահ Սի Ծինփինի հանդիպումների առաջին օրը։ Այս մասին հայտնում է CNN-ը։
«Երկու կողմերը համաձայնել են, որ Հորմուզի նեղուցը պետք է բաց մնա՝ էներգիայի ազատ հոսքը ապահովելու համար», - ասել է Սպիտակ տան պաշտոնյան։
Նա հավելել է, որ հանդիպմանը Սի Ծինփինը հստակորեն հայտնել է, որ «Չինաստանը դեմ է նեղուցի ռազմականացմանը, դրա օգտագործման դիմաց վճար գանձելու ցանկացած ջանքի, ինչպես նաև հետաքրքրություն է հայտնել ավելի շատ ամերիկյան նավթ գնելու հարցում՝ ապագայում նեղուցից Չինաստանի կախվածությունը նվազեցնելու նպատակով»։
Սպիտակ տան ներկայացուցիչը չի հստակեցրել, թե արդյոք Ծինփինը համաձայնել է ընդլայնել Չինաստանի ներգրավվածությունը հակամարտությանը վերջ դնելու գործում։
Առաջնորդները նաև քննարկել են տնտեսական համագործակցությանն առնչվող հարցեր, այդ թվում և Չինաստանից ԱՄՆ ֆենտանիլի արտահանման, ԱՄՆ-ից գյուղատնտեսական ապրանքների գնումների ծավալները մեծացնելու մասին հարցեր։
