Trump Organization հոլդինգը պլանավորում է Վրաստանի մայրաքաղաքում կառուցել 70-հարկանի Trump Tower Tbilisi երկնաքերը։ Այս մասին հաղորդել է The Wall Street Journal-ը:
Շենքը կկառուցեն Թբիլիսիի Կենտրոնական այգու հարևանությամբ: Շենքում կլինեն բնակելի հարկաբաժիններ, խանութներ ու ռեստորաններ։ Թրամփի աշտարակը կլինի 70-հարկանի և կդառնա Վրաստանի ամենաբարձր շենքը։ Նախագիծը մշակում է աշխարհում խոշորագույն Gensler ճարտարապետական ընկերությունը։
Սա Trump բրենդի առաջին նախագիծն է տարածաշրջանում, ինչն, ըստ The Wall Street Journal-ի, ընդգծում է Թբիլիսիի նշանակությունը՝ որպես Արևելյան Եվրոպայի և Ասիայի գործարար կենտրոն։
Նախագծին կմասնակցեն նաև վրացական Biograpi Living, Archi Group, Blox Group և Finvest Georgia ընկերությունները։
Ինչպես հաղորդում են վրացական լրատվամիջոցները, 2012 թվականին Trump Organization-ը հայտարարել էր, որ Վրաստանում անշարժ գույքի նախագիծ է պլանավորում։ Սակայն ընկերությունը հրաժարվել էր այս նախագծից, ինչպես նաև շատ այլ արտասահմանյան գործարքներից, քանի որ Դոնալդ Թրամփն այդ ժամանակ հայտարարել էր, որ ցանկանում է խուսափել շահերի հնարավոր բախումից։
Անդրադառնալով նախագծին՝ Վրաստանի խորհրդարանի խոսնակ Շալվա Պապուաշվիլին ընդգծել է արտասահմանյան ներդրումներ գրավելու կարևորությունը և նախագծի շնորհիվ անշարժ գույքի շուկայում չափորոշիչների բարձրացումը։
