ԱՄՆ նախագահի հատուկ բանագնաց Սթիվ Ուիթքոֆը ՄԱԿ-ի Անվտանգության խորհրդի անդամների հետ քննարկել է տարբեր թեմաներ, այդ թվում՝ Գազայի հատվածի, Պակիստանի և Իրանի վերաբերյալ։ Ինչպես տեղեկացնում է France24-ից, այս մասին հայտնել են փակ դռների հետևում տեղի ունեցած բանակցությունների մասնակիցները։
Նյու Յորքում մոտ մեկուկես ժամ տևած ոչ պաշտոնական հանդիպումը տեղի է ունեցել Ուիթքոֆի՝ որպես Մերձավոր Արևելքի հարցերով նախագահ Դոնալդ Թրամփի հատուկ բանագնացի պաշտոնական երդմնակալությունից մեկ օր անց։
Մայիսի 7-ին տեղի ունեցած հանդիպումից հետո ՄԱԿ-ի Անվտանգության խորհրդի մյուս 14 անդամ երկրների դեսպանները հրաժարվել են մանրամասներ հաղորդել հանդիպման մասին։
ՏԱՍՍ գործակալության տեղեկացմամբ՝ Պակիստանի դեսպան Ասիմ Իֆթիխար Ահմադը հայտնել է, որ քննարկումը եղել է գաղտնի, սակայն հիմնական թեմաներն առնչվել են Իրանին, Պաղեստինին, Ուկրաինային և Պակիստանին։
Պանամայի դեսպան Էլոյ Ալֆարո դե Ալբայի խոսքով՝ դա եղել է «ոչ պաշտոնական հանդիպում, որը շատ հետաքրքիր էր և առնչվել է ոչ միայն Գազային, այլ տարբեր թեմաների»։
Ուիթքոֆը մայիսի 7-ին առանձին հանդիպել է նաև ՄԱԿ-ում Իսրայելի դեսպան Դենի Դանոնի հետ։ Դանոնը հետագայում հայտնել է, որ նրանք «կարևոր քննարկում են ունեցել տարածաշրջանային հարցերի շուրջ»։
Թրամփի մտերիմ դաշնակից, միլիարդատեր Ուիթքոֆը հանդես է գալիս որպես ԱՄՆ-ի կողմից գլխավոր բանակցող մի շարք խոշոր հակամարտությունների, այդ թվում՝ Իսրայել-ՀԱՄԱՍ, Ռուսաստան-Ուկրաինա, և Իրանի միջուկային ծրագրի շուրջ խնդիրների կարգավորման հարցում։
